CAMELIAS MASCOTAS

Troula e tradición nos furanchos de San Brais

Publicado o por

Romeros e romeras xa está aquí San Brais. Aínda que algúns xa levan unhas cantas semanas a celebralo o día grande é este domingo día 3, así que preparade o instrumento e achegádevos a parroquia de Bembrive onde non faltará a música, o viño e o cocido.


 

Descargar o mapa aquí

 

Así que se apagaron as luces do Nadal, en Bembrive subían a persiana os primeiros furanchos da tempada. Cada vez son máis os que se animan a abrir cedo as súas portas ante a boa acollida do público que nestas datas visita por milleiros a parroquia viguesa. Este ano a ruta furancheira a compoñen 23 establecementos. Hainos máis e menos enxebres, para aqueles que busquen algo auténtico poden visitar o furancho o Chivo, o de Chicha ou O Castelo ambos ao carón da igrexa e no que o chan é de terra.

REVISTA NOVEMBRO

Aínda que famosa polo viño, todos sabemos que nesta festa non se trata de buscar grandes calidades. Ademais de haber viño e licor a esgalla tampouco falta a comida. O máis típico é ir comer o cocido. No propio día a maioría dos furanchos traballan baixo reserva, como a Blasa e o Rianxeira, e en toda casa da contorna hai comilonas de peñas e grupos de amigos. A maioría tamén ofrecen tapas típicas como tortilla, chourizo, croquetas ou zorza; non acostuma haber moita variedade pero están ben preparadas a uns prezos moi alcanzables.

O outro gran piar desta festa e a música. Todo aquel que sabe tocar un instrumento tradicional coñece San Brais. Non é preciso que vaias co teu grupo, pois aquí sempre tes algúns gaiteiros ou pandereteiros aos que unirte para tocar, cantar e bailar. A improvisación é a raíña nesta festa na que calquera cousa pode xurdir. Pero tamén é certo que hai furanchos que non o deixan todo ao azar e contratan grupos para caldear o ambiente. É o caso do furancho Endulza tu vida, situado no camiño dos Novelos, é sen dúbida un dos máis animados e cada día podemos gozar dun par de actuacións nas que hai dende música tradicional ata batucada pasando por rock e incluso sons balcánicos.

Como todo nesta vida e, a pesar de moitos, o San Brais tamén evoluciona e son cada vez máis os ‘disco-furanchos’. Eses que optan por pinchar algo de música en contra da música tradicional ao vivo.

The following two tabs change content below.
My Twitter profileMy Facebook profileMy LinkedIn profileMy Instagram profile

Tamara Novoa

Xornalista por vocación. Marchou a Londres estudar un master en Xornalismo Internacional e tras traballar varios anos en Barcelona nunha Asociación sen ánimo de lucro, decide volver ao seu Vigo natal. Na actualidade é unha das creadoras deste proxecto. O que lle permite desenvolver unha das tarefas polas que sinte maior paixón: contar historias relacionadas coa cultura e a movida da súa ben querida cidade olívica.