Pontellas vence nun concurso de rondallas de alto nivel

Publicado o por

A rondalla de Pontellas alzouse co primeiro premio do tradicional concurso, que se celebrou onte no IFEVI. A segunda posición foi para Santa Eulalia de Mos e a terceira para Nosa Merced de Chain. Atios levou o galardón ao mellor conxunto de abandeirados.

Puntualmente ás 17.00 horas da xélida e soleada tarde de onte, os rondalleiros de Guizán inauguraban o terceiro Concurso de Rondallas organizado pola Xunta de Galicia no IFEVI. Charrascos, pandeiretas, castañolas e demais instrumentos entoaron durante 12 minutos tanto temas tradicionais como modernos ante a atenta mirada do público que abarrotaba as gradas do pavillón. A de Guizán foi a primeira dun total de trece actuacións que se prolongaron ata case ás 20.00 horas da tarde.

Como novidade, este ano foron cinco as rondallas premiadas en lugar de tres, e tamén cinco conxuntos de abandeirados. As primeiras posicións do palmarés non sorprenderon a ninguén. O podio debatíase entre as rondallas de Santa Eulalia de Mos e a da Sociedade Cultural de Pontellas, finalmente foi esta última a que se alzou coa primeira posición. Máis dúbidas había nas tres posicións restantes, pois o nivel das rondallas era moi alto este ano. O terceiro premio recaeu na rondalla Nosa Merced de Chain, o cuarto  na rondalla do Centro Cultural de Torroso e o quinto na do Centro Cultural de Herville. Os conxuntos de abandeirados, que encheron de cor o recinto coas súas coreografías, foron premiados no seguinte orden: Atios, Chain, Pontellas, Valadares e Beade.

Como xa é habitual as rondallas sorprenderon aos asistentes coas súas particulares intrepretacións de temas coñecidos por todos como Sweet child of mine tema co que entrou en pista a rondalla de Pontellas, Quero Josar dos Heredeiros soou nas gaitas e pandeiretas de Santa Eulalia de Mos e o eurovisivo tema La venda foi interpretado ata por tres rondallas diferentes.

Actuación completa da rondalla vencedora:

The following two tabs change content below.
My Twitter profileMy Facebook profileMy LinkedIn profileMy Instagram profile

Tamara Novoa

A súa curiosidade fixo que estudase xornalismo. Agora ten unha boa escusa para preguntar (case) todo o que quere. Sempre lle interesaron os movementos cidadáns e entende que os medios de comunicación deben cumprir un labor social. No 2018 cofundou A Movida co obxectivo de contribuír a un Vigo culturalmente máis activo.

Publicaciones relacionadas:

  1. Pontellas álzase raíña no concurso de Rondallas
  2. O Concurso de Rondallas volve ao Ifevi este domingo
  3. Concurso Rondallas 2019
  4. Wilfried Wilde: “Non sei se en Galicia o jazz ten moito público, pero si moitos músicos de gran nivel”