Os edificios máis bonitos de Vigo
A pesar das moitas desfeitas levadas a cabo nas últimas décadas, Vigo continúa a ser o fogar dunha boa cantidade de edificios de gran valor cultural e arquitectónico. Como non nos parecía xusto quedarnos só cos máis feos, fixemos tamén esta listaxe coas construccións que, ao noso xuízo, axudan a facer de Vigo unha cidade fermosa. (Fotos: Noelia Míguel)
1. EDIFICIO EL MODERNO
![](https://amovida.gal/wp-content/uploads/2021/04/Hotal-Moderno-1-1024x683.jpg)
Xa avisamos que non será a única obra do xenial arquitecto francés Michel Pacewicz. Inaugurada en 1902, poucos anos despois pasaría a chamarse Hotel El Moderno. A pesar da máis que cuestionable modificación sufrida en 1977, que estragou a cúpula de escamas cromáticas orixinal, continúa a ser unha das edificacións referenciais da cidade, situada no lugar máis céntrico posible. A fachada de estilo barroco francés é unha absoluta delicia. Xusto diante temos o Edificio Simeón, unha fantástica construcción modernista dos irmáns Benito e Manuel Gómez Román, e o Edificio Pardo Labarta, obra de Jenaro de la Fuente Domínguez.
2. CASA YÁÑEZ
![](https://amovida.gal/wp-content/uploads/2021/04/Casa-Yanez-1-1024x683.jpg)
Seguindo con Pacewicz, a Casa Yáñez ten posiblemente a galería neogótica de madeira máis impoñente da cidade. Un edificio historicista de cinco andares situado na Alameda e firmado polo mestre de obras Dimas Vallcorba, xa que Pacewicz, ao ser francés, non estaba capacitado para asinar os seus propios proxectos. O escritor Pedro Feijoo, un gran coñecedor da nosa arquitectura, localizou parte da trama do libro Os fillos do mar neste edificio.
3. TEATRO GARCÍA BARBÓN
![](https://amovida.gal/wp-content/uploads/2021/04/Teatro-Afundacion-2-1024x683.jpg)
Sen saír do centro da cidade atopamos o Teatro García Barbón, na actualidade Teatro Afundación, fogar de grandes espectáculos, concertos, monólogos ou óperas. A construcción levantouse en 1927 despois de que o Teatro Rosalía de Castro, situado no mesmo lugar, ardese por completo nun incendio en 1910. As sobriñas de José García Barbón continuaron cos desexos do seu tío e encargaron a Antonio Palacios o proxecto de reconstrucción. Na década dos setenta Desiderio Pernas foi o responsable da ambiciosa rehabilitación levada a cabo polo novo dono do inmoble, a Caixa de Aforros Municipal de Vigo.
4. EDIFICIO ALBO
![](https://amovida.gal/wp-content/uploads/2021/04/Edificio-Albo-2-1024x683.jpg)
O arquitecto vigués Francisco Castro Represas e o madrileño Pedro Alonso encargáronse do levantamento deste formidable edificio situado no cruce das rúas Urzáiz e Gran Vía, un punto no que tamén fan esquina outras dúas notables construccións (Hotel Lisboa e o coñecido como “A Peineta”). Sete anos (1942-1949) foron necesarios para rematar a vivenda debido a escaseza de ferro e cemento nos anos de posguerra. O edifcio leva o nome da familia Albo, procedente de Santander, que fixo fortuna na industria conserveira. No seu vértice máis alto atopamos unha reprodución da escultura de orixe grega que conmemora a Vitoria de Samotracia, que se atopa no Museo Louvre.
5. EDIFICIO BONÍN
![](https://amovida.gal/wp-content/uploads/2021/04/Edificio-Bonin-4-1024x683.jpg)
Na rúa Areal atopamos este espectacular edificio modernista obra de Jenaro de la Fuente Domínguez. Polas datas e polo seu estilo, hai que sinala que podería tratarse dunha resposta ao Hotel Moderno de Pacewicz, o cal non sería estrano xa que ambos arquitectos mantiveron unha rivalidade profesional ao longo das súas traxectorias. A fachada conta con numerosos e excelentes detalles de cantería e cunha fermosa cúpula na esquina coa rúa Oporto.
6. EDIFICIO DE CAMILO E BENIGNO FERNÁNDEZ
![](https://amovida.gal/wp-content/uploads/2021/04/Edificio-Stradivarius-1-1024x683.jpg)
Continuando co arquitecto vallisoletano, no nº28 de Urzáiz atopamos esta marabilla modernista construída para os irmáns Camilo e Bengno Fernández, membros de familia rica e burguesa. A ornamentación da fachada é dun eclecticismo abraiante, especialmente as tres galerías de granito que recorren o edificio verticalmente. O portal merece unha mención a parte, amparado baixo unha estupenda circunferencia e decorado con motivos florais en ferro e pedra. Entre 1957 e 1966 viviu o escritor Celso Emilio Ferreiro, dato que vén recollido nunha placa á beira da entrada. Nese tramo de Urzáiz atopamos outras destacadas construccións como o Edificio Aurora Polar, Edificio Emilio Méndez, Edificio El Reloj, Casa Vicente Coma…
7. INSTITUTO SANTA IRENE
![](https://amovida.gal/wp-content/uploads/2021/04/IES-Santa-Irene-Porta-Atlantico-2-1024x683.jpg)
Situado ao pé da Praza de América, foi un agasallo á cidade de Policarpo Sanz, quen lle puxo o nome da súa esposa falecida, Irene de Ceballos. Foi obra do arquitecto vigués Antonio de Cominges y Tapias, autor doutras construccións emblemáticas da cidade como a Igrexa da Soidade ou a actual Sede de Abanca. Realizada totalmente en granito, conta cun gran reloxo no alto da torre, polo que desde hai anos vense celebrando o aninovo nas súas inmediacións. O instituto fundouse en 1946, e polas súas aulas pasaron mestres como o escritor Xosé Luis Méndez Ferrín.
8. EDIFICIO BANCO DE VIGO
![](https://amovida.gal/wp-content/uploads/2021/04/Banco-Pastor-Santander-3-1024x683.jpg)
Non sería xusto non incluír ningunha obra do xenial arquitecto Manuel Gómez Román, autor dalgúns dos mellores edificios da cidade (Simeón, Mülder, Casa de Correos ou a Panificadora). Este esdificio, actualmente sede do Banco Pastor, trátase dun chafrán entre as rúas Policarpo Sanz e Colón. Foi elaborado con granito de Castrelos de gran calidade, debido a que na contrucción colaborou o mestre canteiro José Araújo Pérez, socialista pioneiro e organizador da Sociedade de Canteiros. Entre os moitos detalles da súa fachada destacan o busto de Hermes, deus do comercio, e cinco figuras que representan os cinco continentes.
9. CASA MÜLDER
![](https://amovida.gal/wp-content/uploads/2021/04/Casa-Mulder-2-1024x683.jpg)
Este edificio situado en Montero Ríos recibe o nome do seu primeiro propietario e a persoa que o mandou construír, Enrique Mülder Palmer. De novo, unha marabilla modernista de Manuel Gómez Román, desta vez con claras influencias centroeuropeas, recollidas nas rúas de Bruselas e Viena. O máis destacable desta casa de tres pisos é a cúpula recuberta de cerámica que moldea a totalidade do edificio facéndoo curvo e carente de esquinas. Baixo a cúpula, podemos atopar mosaicos, tamén de cerámica, con motivos mitolóxicos e vexetais.
10. CASAS DE OYA
![](https://amovida.gal/wp-content/uploads/2021/04/Hotel-NH-1-1024x683.jpg)
Casas de Oya é o nome orixinal do que todos os vigueses coñecemos como “o NH”, o hotel situado no cruce entre Policarpo Sanz e República Arxentina. De novo, Pacewicz está detrás da idea que foi encargada en 1904 por outro famoso empresario da época: José García Barbón e construído en granito a imaxe e semellanza dos que se facían en Francia naquel tempo. Cando se reformou no 1998 engadíuselle un faiado metálico.
Pablo Vázquez
Últimos posts de Pablo Vázquez (ver todos)
- A viguesa Vanesa Álvarez inicia en Coia un mural de 2400 metros cadrados coa axuda de 170 voluntarios - 23 Xullo, 2024
- Dez libros para coñecer Galicia - 22 Xullo, 2024
- Oito espazos museísticos participan este venres 26 na Noite Branca - 19 Xullo, 2024
- Ed Sheeran bástase el só para coroar o Monte do Gozo - 7 Xullo, 2024
- O Vigo SeaFest volve encher o Náutico de música, gastronomía e actividades mariñas - 2 Xullo, 2024