CASAACUNHA

Guillermo Pastrana acompañará a Orquesta Clásica de Vigo no primeiro concerto da tempada

A orquesta Clásica de Vigo arranca a súa nova programación o 22 deste mes coa interpretración do Concerto para violonchelo composto en 1919 por Edward Elgar. O ciclo Escoitas complétase con outros catro concertos, o último deles en maio.

En 1984, o asturiano Manuel Martínez Álvarez-Nava chega á nosa cidade e sorpréndese ao ver que en Galicia non existe ningunha orquestra. De aí nace a Orquesta Clásica de Vigo, que desde o inicio apostou pola innovación nos formatos. Durante os anos que leva en activo, as obras interpretadas cóntanse por centos e, nos últimos programas, inclúense propostas con bandas sonoras, cine en directo ou danza, combinando obras consagradas con fórmulas máis actuais. A exploración musical é un dos principais obxectivos da agrupación, que experimentou con cousas como a electroacústica, coa música antiga ou co órgano. Ao combinar diferentes fórmulas, achéganse a públicos moi diversos. A cerna da orquestra está formado por medio cento de persoas, pero amplíase ao longo do ano a través de diversos programas en colaboración con diferentes músicos. Unha das características desta orquestra é que nela conviven músicos que aínda están no conservatorio con outros que teñen xa unha traxectoria moi ampla, de xeito que hai un transvase constante de coñecemento.

A nova temporada da Orquesta Clásica arranca o sábado 22 e está composta por cinco espectáculos. Inaugura o ciclo co Concerto para violonchelo composto en 1919 por Edward Elgar, unha das pezas máis recoñecidas para este instrumento, sobre todo tras o paso na década dos anos sesenta do século pasado polas mans de Jacqueline du Pré, artista que elevou esta obra complexa, visceral á categoría actual; trátase dunha peza única interpretada polo afamado solista granadino Guillermo Pastrana. Completa o programa a interpretación da Suite xaponesa do compositor británico Gustav Holst, unha peza bastante inusual que comparte época, estilo e nacionalidade co anterior. O concerto é precedido pola estrea de Tempestas, de Ismael Amoedo Collazo, artista gañador do primeiro certame CreaClásica (2019), unha aposta da Orquesta Clásica de Vigo pola creación contemporánea.

Programación

ELGAR

22/10/22 | 20:30h | Teatro Afundación de Vigo

Solista: Guillermo Pastrana

CONCERTO EXTRAORDINARIO DE NADAL

29/12/22 | 20:30h | Teatro Afundación de Vigo

GLASS

04/02/23 | 20:30h | Teatro Afundación de Vigo

Solista: Marcos Escobar

CANTO DE EMIGRACIÓN (película con música en directo)

26/03/23 | 20:30h | Teatro Afundación de Vigo

CHAIKOVSKI

06/05/23 | 20:30h | Teatro Afundación de Vigo

Banner A Movidiña

Solista: Giuseppe Andaloro

Venda de entradas

As entradas o concerto de Elgar xa están á venda en Ataquilla. Co fin de promover a asistencia de todos os públicos, a Clásica decidiu reducir os prezos. Para este concerto, as entradas custan desde 5 euros a 14 euros segundo a butaca. As entradas na billeteira antes do evento custarán 5 euros para menores de 30 anos.

The following two tabs change content below.
Xornalista por vocación. Marchou a Londres estudar un master en Xornalismo Internacional e tras traballar varios anos en Barcelona nunha Asociación sen ánimo de lucro, decide volver ao seu Vigo natal. Na actualidade é unha das creadoras deste proxecto. O que lle permite desenvolver unha das tarefas polas que sinte maior paixón: contar historias relacionadas coa cultura e a movida da súa ben querida cidade olívica.