Miss LaCé aspira converter a Sala Ártika no cabaret de Vigo

Picardía, sensualidade e humor son os compoñentes principais do espectáculo burlesque Miss LaCé, ao que podemos asistir estes días na Sala Ártika. Miss LaCé aspira a se converter nun evento permanente da sala de teatro situada en Beiramar, dotando a Vigo do seu primeiro Cabaret.

Miss LaCé é o alter ego de Cecilia Vázquez, actriz licenciada pola ESAD. Ela é a gran protagonista deste espectáculo que aspira a se converter nun referente das noites de fin de semana na cidade olívica. Onte asistimos a estrea na que Miss LaCé estivo acompañada por Rony Flamingo, Son Lesòn e Iván. Un show que non estivo exento de humor. Principalmente nas actuacións de Son Lesòn unha ama de casa aspirante a bailarina de cabaret que a medida que avanza o show vai evolucionando nas súas dotes sobre o escenario. Boas doses de risa as trouxo Iván, que con picardía e humor foi o que máis interactuou co público, sacando as cores a máis de un. Rony Flamingo e Miss LaCé actuaban a modo de fío condutor do show. Ela, unha bailarina aspirante a estrela. El, un manager farsante. Xuntos percorren o mundo. Un mundo que os espectadores visitamos a través das actuacións de Miss LaCé que nos levou da rebeldía xitana, ao carácter flamenco á sensualidade parisina. Cecilia fixo subir a temperatura da sala Ártika coas súas actuacións. Deixou patente que ten ben dominada a arte de espirse con elegancia e magnetismo.
Unha proposta que de se consolidar serviría para encher un baleiro na oferta de ocio de Vigo, que non conta con ningún show permanente destas características. De ter continuidade, bótase en falta que algún dos shows máis sensuais non teñan como protagonista a home ningún, de ben seguro o público feminino o agradecería.

The following two tabs change content below.

• Bio
• Últimos posts

Tamara Novoa

Xornalista por vocación. Marchou a Londres estudar un master en Xornalismo Internacional e tras traballar varios anos en Barcelona nunha Asociación sen ánimo de lucro, decide volver ao seu Vigo natal. Na actualidade é unha das creadoras deste proxecto. O que lle permite desenvolver unha das tarefas polas que sinte maior paixón: contar historias relacionadas coa cultura e a movida da súa ben querida cidade olívica.

Últimos posts de Tamara Novoa (ver todos)

• O 17º Ribeira Sacra consegue burlar ao COVID19 - 3 Agosto, 2020
• Mclan empraza a Vigo a un ‘Concierto salvaje’ - 27 Xullo, 2020
• Os roteiros de Vigo Pesqueiro convídannos a coñecer o legado do mar - 19 Xullo, 2020
• Pedro Feijoo: “A xente non sabe a cantidade de burradas que se chegan a compartir, pedir e demandar na rede” - 4 Xullo, 2020
• Francisco Castro: “O franquismo é como o aire, está aí pero non se nota” - 29 Xuño, 2020