JORGE PARDO

Katerina Linke: «O galego é unha lingua moi musical»

Publicado o por

[Esta entrevista foi publicada na reportaxe Á reconquista da lingua, da revista de Maio do 2019. Pincha aquí para volver ao artigo principal]

Esta petersburguesa é unha pianista e compositora que leva afincada en Vigo desde hai case dez anos. Xunto con Su Garrido Pombo e Susanna Blanco forma Son Trío, un grupo nado en 2017 a raíz dun concurso no que musican poemas de grandes nomes da literatura galegas como Rosalía de Castro ou Celso Emilio Ferreiro.

Cal foi o primeiro nome da literatura galega que descubriches?

Creo que foi Rosalía de Castro. O proxecto de Son Trío naceu porque un día atopei no xornal un concurso do Concello de Vigo, Musicando a Rosalía, que desgraciadamente só se fixo aquel ano. Ao ler a obra completa da autora, gustáronme moitísimos poemas. Escollín un, compuxen a música e gañamos o concurso. Despois decidín continuar cun ciclo de poemas de Rosalía musicados por min, e así naceu o proxecto Miña almiña.

Non tiveches ningún problema para entender o galego?

Non, sempre entendín ben o galego, só me custa un pouco falalo. Como traballei en Portugal, tiven que aprender portugués. Esta mestura entre galego, portugués e español armou na miña cabeza unha lea tremenda. Falo en galego desde hai uns meses, porque me estou a preparar para unhas oposicións. Fun a clases hai dous anos, para preparar as probas Celga 3 e 4. Fixen os exames, pero non os aprobei, son incriblemente difíciles.

Por que te decidiches a aprender a falar en galego?

Primeiro porque con Son Trío fago concertos, no escenario ten sentido falar en galego. Despois gustoume moito, porque é unha lingua moi musical. Relaciónase co español como se relaciona o ruso co ucraíno, que se parecen, pero o ucraíno é máis musical e agarimoso.

Foi doado musicar poemas de Rosalía?

Algúns temas saíronme dun xeito case instantáneo. Con outros poemas tiven que pensar un pouco máis, tivemos que cambiar cousas ao ensaiar. Pero a maioría xurdiron naturalmente.

DEPO
The following two tabs change content below.
My LinkedIn profileMy Vimeo channel

Pablo Vázquez

Xornalista cultural, fotógrafo e musiqueiro. E vigués. Director de tres documentais e coautor de Son da cidade. O libro da música viguesa do noso século.

Publicaciones relacionadas:

  1. María Alonso Seisdedos: “As máquinas xa nos están substituíndo, e as consecuencias que ten no empobrecemento da lingua son moi evidentes”
  2. Preséntase o concurso ‘Lingua de namorar’ para dinamizar o galego entre a xuventude
  3. Xesús Alonso Montero: «Temos que conseguir que o galego sexa a lingua das clases acomodadas»
  4. Ramón D. Veiga: “Por moi dramática que sexa unha situación, sempre hai que atopar un oco para o humor”