Iria Pinheiro achéganos á dureza do seu parto esta fin de semana na Ártika
Anatomía dunha serea é o relato valente e autobiográfico de Iria Pinheiro. A actriz galega cóntanos en primeira persoa como foi o seu parto. Un acto tan natural e normal coma este, que se vén facendo desde os inicios da humanidade e sobre o que, a pesar de todo, temos un gran descoñecemento. Valente é Iria e valente é o público que se anima a ir ver esta obra, porque moitas veces é máis fácil pechar os ollos e non saber.
O relato de Iria é duro. Explica como cambiou a súa vida desde aquel día no que no hospital decidiron inducirlle o parto. Unha experiencia que viviu case como espectadora e non co protagonismo que lle debería corresponder. Foi despoxada de calquera tipo de poder de decisión e a información do que estaba a acontecer era escasa e confusa. Iria denuncia ser vítima da violencia obstétrica e asegura que ao igual que ela, hai moitas outras mulleres que viven situacións parecidas.
Pinheiro, que aínda se está a recuperar das secuelas dese parto que tivo lugar hai máis de tres anos. emprega esta obra a modo de terapia. Ao tempo contribúe a que se abra un debate necesario para que as mulleres recuperen o poder que se lles arrebatou.
É a primeira vez que temos a posibilidade de ver en Galicia este tema a ser tratado sobre as táboas. Hoxe e mañá podemos achegarnos a sala Ártika coñecer a historia de Iria. Podemos ir sen medo, porque aínda que é unha testemuña dura a representación está chea de sarcasmo que arrincará en nós máis dunha gargallada.
Últimos posts de Tamara Novoa (ver todos)
- Xosé González Martínez: «O 25 de xullo, os presuntos galeguistas brindan con viños etiquetados en castelán» - 10 Maio, 2021
- José Arcas: “As Cíes son moito máis que a praia, as gaivotas e o faro” - 9 Abril, 2021
- Manuel Jabois: “Dáseme ben facer preguntas porque son xornalista pero un novelista tamén ten que dar respostas” - 11 Marzo, 2021
- África González: «Hai anos, as mellores informáticas eran mulleres» - 5 Marzo, 2021
- Galaxia presenta un libro sobre o feminismo de Emilia Pardo Bazán - 4 Marzo, 2021