Aniversario Mondo Club: Call Super

Mondo Club celebra en maio o seu 15 Aniversario con máis de 30 artistas invitados. Despois de 15 anos a sala viguesa celebra este aniversario tan redondo ao longo do mes de maio, cunha serie de eventos especiais polos que pasarán máis dunha trintena de artistas, entre DJ’ s residentes, convidados locais, de toda Galicia, Madrid, e varios artistas internacionais inéditos no norte de España.

Mondo Club abandera os sons de club contemporáneos que transcenden xéneros e etiquetas, rastrexando o talento emerxente e as propostas arriscadas e menos acomodadas do cada vez máis cambiante panorama da música de club. Seguindo esta dinámica preparaeron tres xornadas de concertos e festas de 1 a 6 da mañá:

Sábado 14 de maio : a sétima edición das festas FLUX, comisariadas polos novísimos artistas vigueses Yugen Kala. Nesta ocasión, Flux presenta por vez primeira vez na península ao artista londiniense de Pop experimental MRWIZE, xunto á activista dixital Beatrix Weapons, ambos en formato de directo audiovisual. Xunto a eles, estarán os ruso-italianos Xa Ru e os membros do colectivo madrileño Ciénaga Electrónica Frpinkl e Porexpanda, nunha noite de marcado contido experimental e de sons de vangarda.

Venres 20: nova FLUX, a número #8, coa visita do surafricano DJ Lag, heroe do son gqom, un estilo cru e repetitivo repleto de baixos profundos. Xunto a el, estarán Saya, investigadora musical e artista multigénero santiaguesa de orixe palestina, e os misteriosos residentes X- FLU.

Sábado 21 chegará a quenda do artista inglés Call Super, un dos nomes máis destacados da electrónica contemporánea europea. A súa meticulosa aproximación á composición musical identifícao como un dos nomes recentes máis orixinais e persoais da nova fornada de músicos e DJ’ s que dominan os clubs e festivais menos conservadores, grazas tamén á intensidade hipnótica das súas DJ sets. Xunto a el, os tres residentes da sala SUB de Mondo: Malaguita, FonKid e Viktor Flores. Entradas aquí.