A vía verde énchese de solidariedade por un día grazas a Embárriate Teis
Este xoves 6, de 10:00 da mañá a 18:00 da tarde, unhas pequenas casas de cartón ocuparon un tramo da vía verde, á altura do parque da Riouxa. Trátase dunha exposición efémera titulada Fogares con cor, que forma parte do programa Embárriate Teis 2024: encontros nos patios, desenvolvido pola Fundación da Santa Cruz.
![](https://amovida.gal/wp-content/uploads/2024/06/EmbarriateTeis_7.jpg)
Os viandantes e ciclistas que circularon este xoves pola vía verde pola zona de Teis igual se tropezaron cunha morea de xente e unhas pequenas casiñas de cartón penduradas duns cordeis. Trátase da exposición Fogares con cor, que forma parte do programa Embárriate Teis 2024: encontros nos patios, desenvolvido pola Fundación da Santa Cruz. Decenas de escolares e membros de asociacións visitaron a mostra ao longo da xornada, de 10:00 a 18:00. Esta intervención artística foi realizada desde febreiro ata hoxe polas persoas usuarias desta Fundación, que recibiron a axuda de varias asociacións e colexios de Teis. En total, unhas 600 persoas participaron na elaboración desta mostra efémera, que só estivo dispoñible este xoves 6 de xuño.
![](https://amovida.gal/wp-content/uploads/2024/06/EmbarriateTeis_10.jpg)
Ademais dos 25 usuarios de Santa Cruz, sete centros escolares (CEIP Paraixal, CEP Santa Tegra, CEIP San Salvador, CEIP Vicente Risco, CEIP Frian de Teis, Colexio San José da Guía e CEIP Alexandre Bóveda) e catro entidades do barrio (Xaruma, Alborada, Centro de día Atalaia e Semente Vigo), ademais da aula hospitalaria do Álvaro Cunqueiro, puxeron o seu gran de area para que isto fose posible. Os obxectivos de Embárriate Teis son reducir o estigma social a través da sensibilización e o coñecemento mutuo e promover a participación e a inclusión social. Os usuarios de Santa Cruz mostráronse moi eomocionados e agradecidos coa rapazada, como no caso de Josema, que recoñeceu que todo aquilo foi feito con “moito agarimo e corazón”.
![](https://amovida.gal/wp-content/uploads/2024/06/EmbarriateTeis_2.jpg)
Disto pode dar boa conta Uxía Guisande, coordinadora deste proxecto de dinamización comunitaria: “Notamos unha evolución persoal moi grande. Ao principio tiñan medo e inseguridade de ir aos colexios, pero ao chegar alí e ver que todo saía ben e que os nenos son adorables, aportoulles moita seguridade, autoestima, mellora nas habilidades sociais e empoderamento“, conta a educadora social. Tamén destaca a importancia de saír da zona de confort e romper un pouco a rutina diaria.
![](https://amovida.gal/wp-content/uploads/2024/06/EmbarriateTeis_16.jpg)
Uxía adiántanos que en 2025 haberá unha segunda parte, pero polo momento quere centrarse nesta primeira etapa, que se dividiu en dúas actividades nos colexios: contacontos co libro Los invisibles de Tom Percival e manualidades para fabricar todas as casiñas de cartón. Estas construccións e este material fan referencia ás persoas sen fogar que, moitas veces, utilizan este material para protexerse do frío na rúa.
![](https://amovida.gal/wp-content/uploads/2024/06/EmbarriateTeis_11.jpg)
Pablo Vázquez
Últimos posts de Pablo Vázquez (ver todos)
- 12 festivais para pechar o verán e comezar o outono - 29 Agosto, 2024
- Pantomima Full, La Ruina, Héctor Alterio ou Cayetana Guillén-Cuervo visitan este outono o Teatro García Barbón - 21 Agosto, 2024
- Acampadas, artistas que non son, erros contractuais, músicos vigueses… así foi Castrelos 2024 - 19 Agosto, 2024
- Por que todos os concellos da contorna teñen festivais de jazz e Vigo non? - 6 Agosto, 2024
- Olaia Maneiro (Tanxugueiras): “Moitas das cantareiras populares morreron pensando que non fixeran nada, e fixérono todo” - 1 Agosto, 2024