REVISTA MAIO

Dixtinta, deixando marca no barrio

Desde o seu local en Coia María e Itziar levan meses demostrando que unha imprenta pode ser un negocio conectado coas necesidades e actividades da cidadanía. En Dixtinta combinan un amplo abano de servizos con maquinaria de alta gama, atención cercana e activismo.

Itziar e María no seu local | Foto: Paula Cermeño

Desde xuño do ano pasado, María e Itziar son socias de Dixtinta, unha imprenta dixital situada no barrio de Coia, do que son oriúndas. Aquí realizan todo tipo de traballos de impresión; algúns dos máis demandados son a papelería corporativa, os vinilos para escaparates ou as lonas publicitarias, así como a impresión de fotografías en pequeno ou gran formato. Tamén realizan estampaxe en bolsas, camisetas ou gorras, tanto para particulares como para regalos corporativos.

«Temos un obradoiro pequeno, pero moi versátil», resume María, que xa tiña experiencia en artes gráficas antes de decidirse a emprender. Alén de tan amplo abano de servizos, incide na atención personalizada que ofrecen, buscando solucións para se achegar á idea inicial do cliente, o que supón unha vantaxe competitiva importante respecto ás imprentas online. Na parte de atrás do local atopamos un gran plotter de sete tintas, capaz de acadar unha calidade moi superior e cores máis vibrantes que as tradicionais máquinas de catro tintas; tamén pode imprimir en tinta branca, algo de grande utilidade na vinilaxe de cristais.

Tamén contan cun láser co que realizan traballos de corte, cruño e gravación de pezas de madeira, metal ou metacrilato; con esta máquina pódense cortar e gravar chaveiros metálicos, realizar letreiros de metacrilato con relevo, ou pirogravar en madeira. Con todos os detalles e realizada en madeira, a máscara de Merdeiro que loce no escaparate é un bo exemplo desta técnica.

A proximidade e o carácter de barrio é parte da filosofía do negocio. Nun primeiro momento, ambas as dúas emprendedoras fixeron o esforzo de presentarse a cada negocio veciño e agora recollen os froitos daquel traballo. «Non nos queremos limitar a traballar entre as nosas catro paredes, senón formar parte da veciñanza e mesmo mellorala no que poidamos», expresa Itziar. Nesta liña, colaboran co podcast vigués Radio Manoplas, primeiro axudando co deseño e agora facéndose punto de venda dos pasaportes da República Independente de Coia que expende a entidade radiofónica e acaban de pechar o patrocinio con outro podcast, Histéricas Históricas, que inclúe a estampaxe de camisetas dese proxecto feminista.

The following two tabs change content below.

Paula Cermeño

Paula Cermeño é licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado avistala en moitos dos saraos vigueses.