'Desconexión' e a necesidade de desconectar de nós mesmos – A Movida

‘Desconexión’ e a necesidade de desconectar de nós mesmos

Todos temos a capacidade de ser boas ou malas persoas. Amables ou rosmóns, entusiastas ou pesimistas, soñadores ou gafes. Todos, en maior ou menor medida, temos algo de todo isto. Xurxo Cortázar enfróntanos a esta dualidade a través do espectáculo ‘Desconexión’. Unha obra aceda que nos pon de fronte contra nós mesmos e a nosa bipolaridade. Sábado 19 e domingo 20 na Sala Ártika.

Cortázar dá vida ao individuo 299/1973 FK3 que vive conectado a un semáforo regulando o tránsito de peóns. Cando viste traxe verde é amable e deixa pasar, cando viste traxe vermello é malencarado e manda parar. Un día sofre unha avaría no seu sistema que fai posible que poda desconectar da súa rutineira vida e fuxir cara a liberdade. Máis, neste periplo vaise atopar con diversas situacións que vai ter que resolver coa dignidade que lle permita o feito de ser un monifate sen personalidade definida. Situacións que na súa maioría todos temos enfrontado e que deixan en evidencia as nosas carencias. O monigote do semáforo representa unha sociedade tremendamente insatisfeita que vive engaiolada na cómoda rutina e que cando ten a oportunidade de saír non é capaz tampouco de acadar a ansiada felicidade. Quizais polo simple feito de que a felicidade non está nin fóra, nin dentro. Está no interior de cada persoa.

Xurxo Cortázar é, sen dúbida algunha, a peza clave deste espectáculo. Durante os 75 minutos que dura a obra, Cortázar é a única persoa enriba dun escenario austero. O actor é capaz de recrear situacións do máis diversas sen que apenas mude nada en escena. Un texto moi traballado, no que se nota a man de Santiago Cortegoso (director do espectáculo), ten gran parte do mérito. A sonoridade é outro dos aspectos clave desta obra. Os espectadores, acostumados a recibir a maior parte da información a través da vista, teñen que agudizar os ouvidos para seguir o que está acontecendo no escenario. O pitado dun coche, o barullo dun grupo de escolares que van de excursión, o piar dos paxaros anunciando un día soleado… A través dos sons, cada espectador é capaz de recrear as diferentes situacións que vai vivindo o protagonista. Un exercicio de imaxinación que fai que ninguén vexa exactamente o mesmo espectáculo.

19mai21:30DESCONEXIÓNTEATRO | Desde 8,00€ 21:30 Sala Ártika

20mai20:00DESCONEXIÓNTEATRO | Desde 8,00€ 20:00 Sala Ártika

The following two tabs change content below.
Xornalista por vocación. Marchou a Londres estudar un master en Xornalismo Internacional e tras traballar varios anos en Barcelona nunha Asociación sen ánimo de lucro, decide volver ao seu Vigo natal. Na actualidade é unha das creadoras deste proxecto. O que lle permite desenvolver unha das tarefas polas que sinte maior paixón: contar historias relacionadas coa cultura e a movida da súa ben querida cidade olívica.
Compartir
X