REVISTA NOVEMBRO

‘A que non podes dicir Coca-Cola? (II)’, de AveLina Pérez

Publicado o por

«A persoa que está sentada ao teu carón na cafetería na que almorzas pan integral con aceite de oliva virxe extra pode levar unha arma. E se é domingo e levas roupa de domingo, ou se é martes e levas roupa de domingo, vas quedar feita un cisco; emporcada do teu sangue e da túa inocencia. É mellor non saír de casa.


En todos os lugares anda o perigo». AveLina Pérez, unha das dramaturgas imprescindibles do teatro galego contemporáneo, volve presentar A que non podes dicir Coca-Cola?, once anos despois da súa estrea, nunha sorte de diálogo entre o traballo de 2011 e o de 2022 e onde volven estar presentes temáticas como a confrontación e a aceptación da violencia imperante, as diferentes formas de alienación na sociedade e a arte como refuxio e espazo de resistencia. Ela dirixe, escribe e protagoniza este monólogo no que Ramón Raíndo encárgase do deseño e da composición musical e Daniel Casquero da iluminación. A que non podes dicir Coca-Cola? (II) é, en palabras da autora, «unha loita inútil e precisa, unha repetición de incertezas, un querer e non poder», pero tamén é a confirmación do pulso dramático e escénico dunha das mellores creadoras que temos nos escenarios de Galicia. A cita é a primeiros de mes no Teatro Ensalle, sala de especial relevancia na carreira artística e profesional de AveLina Pérez e no tecido cultural desta nosa cidade.

Data e hora: xoves 2, venres 3, sábado 4 e domingo 5; ás 20:00 h
Lugar: Teatro Ensalle (rúa de Chile, 15)

The following two tabs change content below.
My LinkedIn profileMy Instagram profile

Ernesto Is

É dramaturgo, narrador oral e docente. Premio Abrente (ex aequo) con 'Fendas' e Premio Rafael Dieste con 'Despois das ondas'. Foi seleccionado polo INAEM no Programa Dramaturgias Actuales ('El hombre que soñaba con elefantes en las estrellas'), no grupo de escrita teatral DramaturXA do CDG ('Onde veñen morrer as baleas') e na bolsa Nuevas Dramaturgias de Euskadi ('Canciones amarillas para flores tristes'). Cofundador da compañía Feira do Leste, coa que estreou 'Exilio das moscas' e 'Tras Tannhäuser' (axudas á Creación Joven do INJUVE). Membro do consello de redacción da erregueté | Revista Galega de Teatro, colabora tamén coa Revista Grial e A Movida de Vigo.