A Movida precisa de ti

Detrás deste proxecto non hai institucións nin grandes corporacións, senón un grupo de xente nova coa arela de traballar a prol dunha cidade máis activa. Co número de outubro facemos trece exemplares da revista, namentres que imos camiño dos dous anos en Internet. Pretendemos achegar un medio de comunicación independente e de calidade coa cultura de Vigo como razón de ser.

A nosa principal fonte de financiamento é a publicidade, pero non é dabondo. Queremos facer máis. Precisámolo. Por iso necesitamos a túa axuda. Se queres que o proxecto se consolide e non quede na ilusión perdida dun grupo de mozos vigueses, subscríbete. Por só 24 euros ao ano recibirás a revista na casa a primeiros de cada mes, participando automaticamente en todos os sorteos que fagamos, ademais de promocións exclusivas para ti.

Podes subscribirte entrando nesta ligazón ou poñéndote en contacto a través do mail revista@amovida.gal ou o teléfono 986 04 24 75.

Apoia o xornalismo independente.

Apoia a cultura en Vigo.

#FaiteAMovidaLover

Tamara Novoa

Edición

A súa curiosidade fixo que estudase xornalismo. Agora ten unha boa escusa para preguntar (case) todo o que quere. Sempre lle interesaron os movementos cidadáns e entende que os medios de comunicación deben cumprir un labor social. No 2018 cofundou A Movida co obxectivo de contribuír a un Vigo culturalmente máis activo.

Pablo Vázquez

Redacción e fotografía

Xornalista cultural, fotógrafo e musiqueiro. E vigués. Director de tres documentais e coautor de Son da cidade. O libro da música viguesa do noso século.

Paula Cermeño de Sáa

Redacción e redes sociais

Licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado atopala en moitos dos saraos vigueses.

Cecilia Vázquez

Departamento comercial

Titulada superior en arte dramática na especialidade de Interpretación Textual pola ESAD de Galicia e licenciada en Publicidade e Relacións Públicas. Coa súa compañía Nena Barbuda traballa para o público familiar, cofundadora da Compañía Olivas Negras coa que protagonizou e produciu 12 Uvas, 2 mulleres e 1 Oliva e leva máis de dez anos traballando no mundo do cabaret e o burlesque. Actualmente está de xira con Lerele; espectáculo homenaxe a Lola Flores e traballa en A Movida no departamento comercial.

Rubén González

Deseño e maquetación

Creativo ao cadrado, Rubén González é licenciado en Publicidade e Relacións Publicas pola Universidade de Vigo. Leva desde o 2004 entre illustrators e indesigns. Pasou por axencias de publicidade e por editoriais nacionais. Como emprendedor, é un dos responsables de Ultramarinos Deseño Galego — marca que quere reinventar o concepto de souvenir— , actividade que compaxina co seu traballo como publicista freelance. Tamén é o responsable do deseño da revista A Movida.

Bea Fariñas

Revisión de textos

Licenciada en Tradución e Interpretación e cun mestrado en Tradución Literaria, ampliou a súa formación lingüística en institucións como o Consello da Cultura Galega, o Centro Ramón Piñeiro para a Investigación en Humanidades ou o Parlamento de Galicia. Especializada no sector editorial, a súa zona de confort é a páxina de créditos. Na actualidade traballa como tradutora e correctora autónoma e dedica o seu tempo libre a ver filmes en linguas que (aínda) non entende.

Beatriz Barros

Deseño web e fotografía

Licenciada en Comunicación Audiovisual e cun afán por contar historias fixo un máster en guión audiovisual. Os vieiros da vida levárona a traballar no mundo da web e no deseño gráfico ao que agora dedica case o 100% do seu tempo. Todo isto sen deixar de lado a súa paixón por contar historias, xa sexa con lapis e papel ou cunha cámara polas rúas do seu querido Vigo.

Estela Gómez

Redacción

Estela naceu no 1992 preto do mar. É filóloga, escritora e correctora literaria, amiga do analóxico, a cultura e a moda vintage. No 2021 foi unha das dez escritoras seleccionadas da Residencia Literaria da Cidade da Cultura dirixida por Javier Peña. No 2025 publicou a súa primeira novela. Poderás atopar a Estela na biblioteca, no cine, no museo, no teatro, nun concerto ou no centro da cidade lendo un libro ao sol.

Tensi Gesteira

Crítica literaria

Nacida en 1992 na vila de A Cañiza, vive desde hai unha década en Bueu. Graduada en xornalismo pola USC, é fundadora da bitácora literaria Lecturafilia, na que se publican recensións de libros, artigos, entrevistas, e coa que xa obtivo algúns premios e nominacións. Exerce desde o 2015 a súa actividade profesional no gabinete de comunicación dun concello, e tamén publica críticas literarias semanais no suplemento Sermos Galiza do xornal Nós Diario, e mensualmente colabora coa revista A Movida. Ademais, nos últimos anos formou parte de varios xurados de premios literarios galegos.

Xurxo Martínez González

Historiador

Doutor cum laudem en Filoloxía Galega e Premio Extraordinario de Tese de doutoramento. Autor de libros de relato, poesía e e ensaio. Colaborador de revistas académicas, ademais de prensa dixital e impresa. Coautor de Marxes. Guía ilustrada do Vigo rebelde e outros libros. Militante antifeixista desde a esquerda nacionalista. Traballa no Concello de Redondela e mantén intacta a vocación pola investigación académica.

Juan Teixeira

Redacción e fotografía

Juan Teixeira é un fotógrafo documental con sede en Vigo. Cursou estudos de Publicidade e Relacións Públicas, pero axiña se decatou de que aquel non era o seu lugar. A través dunha serie de viaxes por Sudamérica e o sueste asiático, observou que a fotografía era unha forma de relacionarse e explorar o mundo dun modo moi persoal, como un espectador que intenta comprender o que sucede ao seu redor. Desde entón intenta comprender ese mundo que o rodea.