REVISTA ABRIL

A cara b da forma

Publicado o por

Liñas sinuosas, cores vivas, natureza e mar. Agustina Shuan (@agustinashuan) combina á perfección todos estes elementos para crear o seu imaxinario e ofrecelo como xoia ou como ilustración; en definitiva, como obra de arte.

Desde outrora, entre Galicia e Arxentina existe a conexión dun fío invisible trazado pola diáspora. Este fío —xunto a unha serie de casualidades que pasan por unha viaxe a Europa e unha estancia en Suecia— conecta a Agustina con Vigo, cidade de acollida na que reside e onde se dedica ao estudo da cerámica artística na Escola Municipal de Artes e Oficios (EMAO). Desde unha idade moi temperá, descubriu que a ilustración sería a súa canle de expresión por excelencia; empezou a debuxar e acabou especializándose en deseño gráfico. En 2014, durante a súa estancia en Suecia, caeu case por casualidade nun taller de fabricación dixital. Alí foi onde descubriu a cortadora láser e, grazas aos descartes e ao material sobrante do propio estudio, comezou a crear os seus primeiros modelos de xoiería. Estes prototipos baseábanse en negativos ou contraformas que a artistabosquexaba sobre papel, e que logo pasaba a dixital para despois recortalos en pezas físicas. Quen lle diría que ese pasatempo, que levaba case ás furtadelas, viría con ela ata Galicia e daría na súa propia marca de xoiería?

Contraform componse de vistosos pendentes e colares. Se queres máis opcións para engadir ao teu xoieiro, esta deseñadora tamén pasa polo láser os personaxes das súas ilustracións, creando broches únicos. Formas abstractas e naturais: soles, lúas, flores, ollos e xeometría xúntanse para darlle un aire desenfadado ás túas orellas. Entre as formas dos pendentes atemporais que deseña, pódense atopar algas atlánticas, estruturas megalíticas, pezas do Tetris e alas para voar. Se es máis de decorar o salón que de encherte de bixutería, os corpos de muller, os animais salvaxes e o reino da flora poden formar parte da túa nova decoración grazas ás ilustracións de Agustina.

REVISTA ABRIL

Onde podemos adquirir estas xoias? Pois achegándonos á tenda Vaidhe (rúa de Carral, 7) ou botando unha ollada ao perfil @contraform en Instagram. Se a túa idea pode imaxinarse, pasarse ao papel, cortarse con láser e ensamblarse… Agustina vai poder facela realidade. Anímaste a pasar á cara B?

Por Estela Gómez

[Esta reportaxe pertence á revista A movida de xaneiro de 2020. Se queres comezar a recibir un exemplar na túa casa, apoiar o noso proxecto e participar en numerosos sorteos, faite #AMOVIDALOVER nesta ligazón. ]

The following two tabs change content below.
My Instagram profile

Estela Gómez

Estela naceu no 92 (o ano de Cobi) preto do mar. É filóloga e correctora literaria, cirurxiá de textos, amiga das redes sociais e ten un interese case innato pola moda e a cultura. Estela é aprendiza de todo e especialista en nada, ten incontinencia verbal crónica, e, grazas á mellor das sortes, as palabras danlle de comer.