CAMELIAS MASCOTAS

Falamos con David Braña, creador do cómic ‘Lady Enigma’

Publicado o por

O pasado mes de febreiro vía a luz en formato físico Lady Enigma, o último cómic do guionista David Braña e da ilustradora Olga Carmona. O escritor catalán leva vivindo na nosa cidade case dúas décadas, e hai anos mesmo localizou aquí unha das súas obras: Dos. Buscando respuestas en Vigo. Falamos con el desta nova publicación e do mundo da banda deseñada en xeral.

  • Retrato de David Braña | Carlos Mercé
  • Debuxo de David traballando | Daniel Morales

A historia de Lady Enigma é ben curiosa. Comezou publicándose de maneira periódica na revista dixital británica Aces Weekly, dirixida polo prestixioso debuxante David Lloyd, famoso entre outras cousas por ser o ilustrador da novela gráfica V de Vendetta. “Estamos moi cómodos con Aces Weekly, dánche total liberdade á hora de crear sempre e cando non sexan historias moi explícitas en canto a violencia ou sexo”, comenta David. En Lady Enigma atoparemos as vivencias de dous irmáns, Sarah e Brian Perkins, no Londres victoriano. El como inspector e ela cos seus poderes paranormais, tentarán resolver uns cantos misterios sen aparente solución.

REVISTA NOVEMBRO

Tras publicar varios capítulos neste portal, a editorial The Rocketman Project mostrouse interesada no cómic e decidiu traelo a España en formato físico. David destaca e agradece o feito de que respectaran o formato apaisado orixinal, non demasiado común neste tipo de publicacións: “Olga e máis eu estivemos estudando diferentes tipos de adaptación ao formato clásico, como xuntar dúas páxinas nunha soa. Mercedes, a editora, tivo claro desde o comezo que quería respectar o formato e na miña opinión quedou moi ben”.

Polo momento poderemos gozar de seis capítulos, debido a que “entran en xogo os tempos dos que dispoñemos os autores, porque non nos dedicamos só a isto nin só a esta obra”, confesa David. Afortunadamente, tamén nos anuncia que xa falou con Olga e que a idea é continuar despois do verán, primeiro en Aces Weekly e máis adiante, se a editorial está polo labor, con The Rocketman Project. Isto déixanos entrever que vivir do cómic en España non é nada doado: “É practicamente imposible, especialmente como guionista, tanto aquí como fóra. Temos que buscar outros formatos e alternativas para gañarnos a vida, ter sempre varios frontes abertos”. Nese abanico de proxectos atopamos editorias españolas, francesas, italianas e estadounidenses, polo que este 2021 promete ser intenso.

Como acontece con tantos mercados artísticos e culturais, o das viñetas tamén está moi saturado: “Eu creo que non hai suficientes lectores para tanto título”, resume entre risos David. A iso podemos sumarlle o pouco agarre do cómic dixital no noso país e a competencia con outros medios de lecer, como as series ou os videoxogos. Con todo, quixo rematar a entrevista animando á xente a descubrir o mundo do cómic: “Ás veces quedámonos só nos de humor e superheroes, pero hai moitísimo máis. Hai un cómic para cada persoa“. Non sabes por onde empezar? Desde hai uns meses, David recomenda títulos na súa canle de Youtube baixo o nome de Brañareseñas, polo que seguro que hai algún que se adapta aos teus gustos.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.