GFFF
GFFF

Xavi Road (Siloé): “Non somos unha banda de repetir fórmulas”

Publicado o por

O dúo vallisoletano Siloé é unha das propostas dos Directos Vibra Mahou para a nosa cidade. Este venres 4 de marzo no Sinatra Coctel Bar, Fito Robles e Xavi Road ofrecerán un concerto no que repasarán a súa discografía e adaptarán o seu ecléctico cancioneiro a un formato máis íntimo. Falamos con Xavi Road, tamén coñecido como XAVSS na súa vertente como DJ. Podes mercar aquí as entradas para o concerto.

REVISTA SETEMBRO
Xavi Road e Fito Robles nunha foto promocional | Cedida

En pleno século XXI é ben difícil innovar no eido musical. Xa son décadas e décadas nas que estilos, instrumentos e modas se suceden de maneira constante, polo que semella estar todo inventado. Con todo, existe xente teimosa que segue na procura dun son propio, diferente. É o caso de Siloé, dúo vallisoletano formado por Fito Robles e Xavi Road, quen na actualidade ofrecen unhas sonoridades pouco sementadas en territorio estatal. Unha mestura de canción de cantautor, indie e electrónica discotequeira que presentan, en estudio e en directo, nas súas diferentes facetas: “Non somos unha banda de repetir fórmulas. Nós facemos o que piden as cancións buscando ese punto persoal, e mesturamos estilos pero sempre cunha esencia melódica”, comenta Xavi Road.

Un repaso á súa discografía, formada por tres álbumes e unha revisión do último, ilustra esta afirmación do músico. La verdad, publicado en 2016, pouco ten que ver con Metrópolis, lanzado en 2020. Ambas zumegan emoción, melodía e pop, pero de maneiras distintas. Se no primeiro abundan os medios tempos de corte indie, no segundo priman os ritmos electrónicos bailables: “No proxecto sempre xogamos moito co concepto de dualidade. O acústico e o electrónico. A melancolía e a euforia. Gústanos camiñar nos extremos, é parte do noso ADN”, explica o tamén DJ e produtor. Siloé fuxe das medias tintas, da terra ninguén, con cancións que buscan transmitir emocións sen titubeos: “Se a canción é triste que sexa moi triste; e se é eufórica, que sexa moi eufórica”, simplifica, sen escapar dos contrastes de música alegre/letra triste, ao puro estilo The Cure.

Debido ao seu espíritu heterodoxo, a banda pon sobre a mesa diferentes opcións para os espectáculos en directo. Para este fin de xira de Metrópolis da man de Vibra Mahou, Siloé aparca o formato festivaleiro e ofrecerá na sala Sinatra un máis íntimo e reducido, en acústico e á luz das candeas. Da mesma maneira, o seu próximo álbum Paradiso, que verá a luz este ano, será triple: un coas cancións en formato normal, outro en acústico e un terceiro en formato remix, que contará coa colaboración de famosos produtores e DJ: “Neste novo traballo queremos que os produtores tamén sexan artistas, non só os cantantes”, finaliza.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.