Suitman: pon o traxe!

Publicado o por

Se algo aprendemos do sobranceiro Barney Stinson, personaxe da serie How I Met Your Mother, é a importancia de vestir un bo traxe. Razón de máis, se o imos levar o día do noso propio casamento. Suitman é o nome tras o que se agocha Fernando González, o encargado de vestirnos adecuadamente para a ocasión.

Fernando González non pasa desapercibido. Nin o seu local, nin os seus traxes nin el mesmo. É directo e ten as ideas moi claras. Ligado desde pequeno ao mundo textil, sempre foi un apaixoado dos traxes. Aprendeu patronaxe, programación e deseño, todo isto a nivel industrial, onde comezou a traballar sendo un adolescente. Hai 15 anos decidiu cambiar o rumbo da súa traxectoria cara un mundo máis artesanal, o da xastrería. Así nace Suitman, primeiro en Moaña dunha maneira máis desenfadada e xa desde hai tempo en Vigo, en plena rúa do Príncipe, totalmente profesionalizado e cun equipo detrás.

Fernando destaca a súa particular maneira de traballar, moi pouco habitual neste eido: “O meu estilo é moi agresivo e atrevido, pero sempre dentro duns parámetros de clasicismo. A liña que separa a elegancia da vulgaridade é moi fina; hai moita xente que pasa da raia e eu por aí non me meto”, explica o xastre. Lembra tamén que cando contratou ás súas primeiras empregadas non entendían o seu xeito de crear, polo que tivo que orientantalas no estilo Suitman. “Eu creo que non hai ninguén en Galicia que faga o que nós facemos; que sexan quen de levar o traxe ao límite como nós”, asegura con firmeza.

Resalta a relevancia dun bo asesoramento, parte esencial á hora de escoller o traxe ideal para cada persoa: “Son incapaz de vender algo que non vai co meu estilo”, afirma. Esta estratexia empresarial tan directa, lonxe de escorrentar á clientela, fai que cada ano teña máis pretendentes, tanto en Vigo como na Coruña, Madrid ou Portugal. Segundo el, o segredo para un bo traxe reside no vendedor, en ofrecer o que cada persoa demanda: “Nos comercios véndenche o que eles queren vender; eu véndoche ou que necesitas”, declara con seguridade.

“É unha odisea, non hai dous exemplos iguais”. Así sintetiza o proceso de crear un traxe a medida para cada cliente, que tantas alegrías (e algunha que outra tristura) lle causan a diario. Estas pezas caracterízanse pola súa singularidade e por ser moi entalladas, con tiro de pantalón baixo e co corte por enriba do nocello. “Quero que o meu traxe se recoñeza pola rúa, pero nunca que vaian facendo o ridículo”, delimita Fernando. Máis aló das vodas, para os apaixoados destas prendas Suitman ofrece unha tarifa plana de 79€ ao mes que inclúe ata cinco traxes a medida ao ano, para recuperar esa elegancia perdida e ao gentleman de cidade de antano.

Suitman | Rúa do Príncipe, 48, 1.º | 639 20 35 17 | @suitmanbespokevigo

REVISTA VERAN
The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.