Solteiros de Vigo: tres plans para febreiro para deixar de selo
Febreiro está a un tiro de pedra, con Cupido apuntando co seu arco tanto as parellas como aos solteiros. Para estes últimos deixamos tres plans para atopar, se queren, esa media laranxa que tanto se escorre.
03/02 Cupido Events: 250 solteiros de festa no Hotel Pazo Los Escudos
Cupido Events, o proxecto que aspira a ser referente na creación de experiencias únicas en España, organiza o 3 de febreiro no Hotel Spa Pazo Los Escudos unha velada que reunirá a 250 solteiros (50% mulleres – 50% homes), contará coa participación do carismático presentador Carlos Veleiro, unha cea cóctel, zonas de citas privadas, barra libre, a presenza dos cupidos do amor e música a cargo de DSYPL e do DJ Saul DËËR; asegurando un ambiente vibrante e cheo de enerxía.
Os interesados en asistir aos encontros previos ou ao evento principal poden rexistrarse no sitio web de Cupido Events ou enviando unha mensaxe directa á conta de Instagram @cupido_events. Para 2025 teñen preparado un cruceiro desde Barcelona para 3500 solteiros pero, se a cousa sae ben en Los Escudos, xa non tes necesidade de ir.
07/02 Miércoles de pinchito na Taberna A Mina
A verdadeira precursora deste tipo de encontros a cegas en Vigo foi a Taberna A Mina, coñecida polos seus petiscos. O primeiro mércores de cada mes organizan Miércoles de pinchito, e os pasos a seguir son os seguintes: pide a túa cerveza e recibirás un posavasos que che acredita como solteiro; se ves ao teu crush escribe no posavasos o que che pete (declaración de amor, número de telefono, conta de instagram…) e entrégallo aos camareiros. A partir de aí só queda esperar a que a maxia do amor xurda efecto.
08/02 Speed Dating no Sésamo Bakery de García Barbón
Novo evento do Club Sésamo con Ser Singles, esta vez, trátase de Speed Dating ou citas rápidas. Estas citas rápidas, deseñadas e dirixidas por coaches profesionais, son unha oportunidade de gozar, coñecendo a outros membros da Comunidade SerSingle, mentres degustas unha deliciosa merenda elaborada por Sésamo.
Inscríbete en hola@sersingle.com ou nos números 625504376 e 678497646.