Sacra Experience, retiro creativo no paraíso lucense
Sacra Experience é unha iniciativa transformadora situada no corazón da Ribeira Sacra dirixida tanto a artistas en proceso creativo como ao público xeral a través de catas, concertos, formación, espectáculos artísticos, encontros e visitas.
Sacra Experience é un exercicio de responsabilidade e sustentabilidade para poñer nas mans de todos unha selección de artistas que buscan canles de comunicación co espazo natural, neste caso un lugar onde a vitivinicultura é unha parte esencial da paisaxe e da comunidade. Falamos de Pincelo, unha pequena aldea á beira do Miño situada preto do encoro de Belesar e a cinco quilómetros da praia fluvial da Cova, na Ribeira Sacra lucense.
Alí, Sacra Experience ofrécenos unha forma diferente de vivir a Ribeira Sacra, coñecer a súa xente e a contorna nunha fermosa casa rehabilitada con capacidade para 12 persoas. A vivenda conta con diferentes espazos, entre eles unha terraza cunhas vistas privilexiadas ao río Miño, onde probar os mellores viños da zona coa máxima tranquilidade.
Sacra Forma, cursos no paraíso lucense
O proxecto Sacra Forma quere poñer en marcha unha experiencia de formación artística multidisciplinar enmarcada na proposta integral Sacra Experience e complementando o Sacra Festival. Un programa formativo conformado por diferentes módulos que levará a cabo entre os meses de febreiro e outubro, contando con artistas e profesionais de diferentes disciplinas, coñecementos e enfoques. Un programa para celebrar no medio dun marco natural privilexiado, con aulas abertas e formacións especializadas para un mínimo de 12 persoas e un máximo de 15.
O próximo curso será un taller de fotografía este 20 de xullo da man de David Jiménez, fotógrafo de ampla experiencia que nos falará do poder da imaxe para expresar emocións e ideas ou de como buscar a inspiración. O seguinte será o 2 de agosto da man do prestixioso cineasta Oliver Laxe, quen falará da súa práctica cinematográfica poñendo como exemplo o actual proceso de realización de After, a roadmovie psicodélica na que leva traballando nestes últimos anos. Oliver compartirá decisións e materiais cos participantes: probas de casting, ensaios con actores, brutos de rodaxe, diferentes versións de guión, localizacións, planificacións, traballo sonoro…
