Os concertos que compoñen a banda sonora deste xullo – A Movida

Os concertos que compoñen a banda sonora deste xullo

O verán é época de concertos e Vigo vén cun mes de xullo cargadiño deles. Ademais da multitude de salas que ten a cidade, que seguirán programando con normalidade actuacións semanais, chegan os clásicos concertos estivais no Auditorio de Castrelos. A falta dun grupo por anunciar, o calendario de Vigo en Festas xa ten nove datas confirmadas neste escenario, seis delas este mes.

Milleiros de persoas nun concerto o verán pasado | Alba Sotelo

Pero antes de ir a Castrelos, facemos unha parada obrigada no Auditorio Mar de Vigo, xa que este sábado 7 vén de visita o pianista británico James Rhodes, probablemente un dos máis famosos do panorama musical da actualidade. Volve a Galicia, tras actuar o ano pasado en Santiago de Compostela. Rhodes é unha figura atípica: foi o primeiro pianista clásico en asinar contrato coa Warner Music, discográfica centrada no pop e no rock, ademais de ser recoñecido mundialmente pola súa capacidade de achegar a tódolos públicos a música de Bach, Beethoben ou Chopin. Nos últimos anos tamén destacou na súa faceta de escritor, na que acumula xa tres títulos, onde destaca a súa autobiografía Instrumental. A Memoir of Madness, Medication and Music, dispoñible traducido ao castelán nas nosas librarías.

07xul21:30JAMES RHODESCONCERTO | Desde 18,00 €21:30 Mar de Vigo

Steven van Zandt, máis coñecido como Little Steven, será o encargado de abrir os concertos de Castrelos o xoves 12 de xullo. O extravertido músico, famoso por levar anos sendo guitarrista da E Street Band de Bruce Springsteen, participou como actor e asesor musical na serie de televisión The Sopranos e presentou nos últimos anos un programa de radio retransmitido a través da emisora estatal Rock FM. Rock and roll para comezar con bo pé as festas.

12xul22:30Little StevenCONCERTO | De balde22:30 Parque Castrelos

O sábado 21 visítanos un dos pesos pesados da historia da música española: Joan Manuel Serrat. O cantautor catalán, con máis de cincuenta anos de carreira ás costas, vén, como xa fixo nos anos 2010 e 2012, disposto a demostrar que a idade non é máis que un número e que este auditorio non o desmerece.

21xul23:00Evento canceladoJOAN MANUEL SERRATCONCERTO | De balde23:00 Parque Castrelos

Dous días despois, o luns 23, chega o que probablemente sexa o prato forte deste ano. Polo menos iso demostrou o público, esgotando todas as entradas en poucas horas. Falamos de Maná. Con tres décadas de carreira e ducias de éxitos polo camiño, a banda mexicana pisará por primeira vez as terras viguesas, tras visitar A Coruña e Santiago nos últimos anos. Non se lembra a última vez que unha banda esgotou tan rápido as 5.000 entradas ofertadas. Ademais, sendo concerto máis caro das festas, mantiña o moi accesible prezo de 11 euros.

23xul23:00MANÁCONCERTO | De balde23:00 Parque Castrelos

Na mesma semana, o venres 27, terá lugar o que por agora é a única xornada con dúas bandas programadas: Dorian e Zoe. A diferenza dos demais días, nos que a hora de comezo é ás 23.00 horas, para ver a estes dous grupos haberá que estar ás 22.30 no recinto. Dorian é unha das bandas máis destacadas da escena indie e electrónica estatal. Os barceloneses presentarán o seu último traballo, Justicia Universal, pero seguro que soarán algúns dos seus temas máis coñecidos como Cualquier otra parte e Paraísos artificiales. Por outra lado, desde México chegan Zoe, banda recoñecida por un estilo único que mestura elementos de diferentes xéneros coma o rock psicodélico, o rock progresivo ou a música electrónica.

27xul22:30Dorian + ZoeCONCERTO | De balde22:30 Parque Castrelos

Os encargados de pechar o mes de xullo en Castrelos serán os colombianos Morat, que o luns 30 tentarán facer bailar e cantar ao público asistente co seu folk-pop suave e pegadizo. Seguro que os espectadores están desexando cantar con todas as súas forzas temas como Besos en guerra, Como te atreves ou Cuando nadie ve.

31xul23:00MoratCONCERTO | De balde23:00 Parque Castrelos

Ademais de gozar con todos estes grupos para gustos variados, desexamos que antes dos concertos poidan tocar algunhas bandas locais a modo de abreconcertos, como xa pasou o ano pasado con Aphonnic.

The following two tabs change content below.

Pablo Vázquez Varela

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É co-director do documental Cuna de Músicos, o que lle fixo coñecer aínda máis a escena musical viguesa. Ten traballado con distintos grupos e locais da cidade, ademais de participar nos últimos anos como Xurado Novo en festivais de cine como o de San Sebastián e Novos Cinemas.
Compartir
X