O Sinsal trae a Vigo a Joseph Keckler, Chemtrails e Bombataz esta primavera
O Sinsal Primavera aposta un ano máis polo eclecticismo cun ciclo de tres concertos nos que escoiteramos por vez primeira en España a Joseph Keckler, Chemtrails e Bombataz. O primeiro dos concertos celebrarase no Museo Marco e os outros dous na sala Radar, as entradas xa están á venda.
A promotora viguesa Sinsalaudio, organizadora do Festival Sinsal SON Estrella Galicia que se celebra cada verán na illa de San Simón, vén de presentar o cartel do evento Sinsal Primavera, un ciclo de concertos eclécticos que promove cada ano na súa cidade natal da man do Concello de Vigo. Esta nova edición florece liberada de prexuízos de xéneros e con tres propostas tan interesantes coma diferentes entre si e que se estrearán en España: desde a voz operística e en constante metamorfose de Joseph Keckler até o jazz contemporáneo dos belgas Bombataz, pasando polo garage-punk da banda inglesa Chemtrails. Con esta iniciativa, a promotora viguesa pretende achegar cada ano ao público a música de bandas e solistas cuxa singular proposta artística non forma parte do circuíto habitual das salas de concertos.
O responsable de inaugurar o ciclo de concertos o martes 15 de abril será o estadounidense Joseph Keckler, quen chegará directamente a Vigo logo de actuar nun dos festivais máis especiais de Europa: o Tremor (Azores, Portugal). Sinalado polo diario The New York Times como “un talento extraordinario que rompe as barreiras convencionais”, Keckler sorprenderá ao público coa súa presenza magnética e o seu espírito provocativo que desafían calquera forma de expresión.
A seguinte cita será o mércores 30 de abril. Melodías pegadizas sinistras, guitarras distorsionadas, sintetizadores primitivos, pop policromático e letras irónicas son a carta de presentación de Chemtrails. Desde Manchester e con tres discos ás costas, a potente banda liderada por Mia Lust chega ao Sinsal para remexer os corpos do público na Sala Radar co seu post-garage-punk e power pop psicodélico.
Finalmente, os belgas Bombataz porán o ramo a esta edición do Sinsal Primavera o sábado 3 de maio para presentar o seu último traballo discográfico, Baby Dry My Tears, un disco inconformista que bebe do espírito de Animal Collective ou MGMT para crear pezas cativadoras que se afastan de calquera estrutura estereotipada. Porque se pode ser diferente, Bombataz farao de forma diferente; mais non para ser intencionadamente difíciles ou por ser pretenciosos, senón porque consideran que é o seu deber musical.
As entradas para as tres citas do Sinsal Primavera están á venda desde as 12.00h deste martes, 1 de abril, na web de Sinsal a través daplataforma Enterticket, cun prezo especial para quen faga a compra anticipada.
CONCERTOS SINSAL PRIMAVERA 2025
15.04.2025, 20.30h | MARCO. Salón de actos
JOSEPH KECKLER (Estados Unidos)
Entradas á venda en Enterticket (12€+gastos)
30.04.2025, 21.30h | Sala Radar
CHEMTRAILS (Reino Unido)
Entradas á venda en Enterticket (10€+gastos)
03.05.2025, 21.30h | Sala Radar
BOMBATAZ (Bélxica)
Entradas á venda en Enterticket (10€+gastos)