REVISTA ABRIL

O Centro Abertal propón un lecer cultural e inclusivo

Publicado o por

Desde 1979 a Asociación Centro Xuvenil Abertal, con sede na rúa Venezuela, propón unha oferta de lecer educativo para as nenas, nenos e adolescentes de Vigo, cuxo obxectivo é erradicar a exclusión social e mellorar a calidade de vida das persoas. Esta fin de semana un grupo deles pasouse pola exposición de Aarón Moucho en F**k this Studio.

Entre as diferentes iniciativas levadas a cabo por Abertal destaca Caixaproinfancia, un proxecto impulsado e financiado por Obra Social La Caixa que ten o obxectivo de mellorar a calidade de vida de menores en risco de exclusión social, dotándolles tanto de recursos como material escolar, lentes, audífonos, como de servizos, apoio escolar e lecer educativo. Está coordinado pola asociación Arela e desde Abertal ocúpanse do reforzo escolar e o lecer educativo.

REVISTA ABRIL

O pasado venres, acompañados pola súa titora Ana Carlota Gil Ares, visitaron o espazo artístico F**k this Studio (Galería Plata, Urzáiz 83), onde coñeceron a obra de Aarón Moucho da man do propio artista. Ana confésanos que decubriu este espazo grazas ao noso artigo publicado en xullo do pasado ano, e tamén que o seu grupo de adolescentes gozou da exposición e mesmo levaron algunhas camisetas serigrafiadas por Moucho.

Mohamed, un dos rapaces de 16 anos, comenta que as ilustracións deixárono “sen palabras”, e laméntase de que “non haxa máis lugares así onde as persoas tanto novas como adultas poidan atoparse e inspirarse”. Yussara, de 14 anos, tamén opina que F**k this Studio é un lugar no que “inspirarse e aprender”, ademais do “impresionantes” que eran os debuxos. Eric, de 15 anos, vai máis aló e di que “o artista e este estudo fannos ver que con dedicación podes conseguir cumprir os teus soños e dedicarche ao que máis che gusta”. Por último, Andrea, de 14 anos, destaca o “agradables e simpáticas” que eran as persoas que alí estaban.

A saída da semana pasada non foi unha excepción, xa que todos os venres de 16:30 a 20:30 realizan actividades de lecer, tanto dentro como fora do centro, aproveitando a gran oferta cultural da nosa cidade. Este ano, como novidade, dedican unha parte do tempo á adquisición de competencias dixitais impartidas por un profesional no Colexio Salesianos.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.