Nace A Nubeira, o centro social para loitar en comunidade contra o desmantelamento cultural
O centro social de recente creación A Nubeira celebra unha xornada de presentación en Churruca. A Nubeira vén cubrir un oco ata agora baleiro en Vigo, un centro social autoxestionado pola cidadanía á marxe das institucións, desde o que impulsar demandas sociais e actividades culturais.
![](https://amovida.gal/wp-content/uploads/2024/06/a-nubeira.jpg)
O vindeiro día 14 de xuño, venres, será a presentación oficial do proxecto CS A Nubeira, un centro social autoxestionado que está a traballar para impulsar demandas sociais e actividades culturais nunha cidade que consideran “caracterízase por unha notable perda de tecido asociativo e cultural”. O evento será na zona de Churruca, e incluirá varios concertos e sesións de DJ na Sala Kominsky, organizados xunto á plataforma Grupos de Vigo en Loita, así como un bingo-performance no bar Tinta Negra, da man de Petra Porter. O recadado ao longo da xornada servirá para sufragar os gastos da creación da nova iniciativa.
O obxectivo do proxecto do CS A Nubeira é “crear un espazo de encontro para a veciñanza e os movementos sociais á marxe das institucións, un espazo transformador que non existe a día de hoxe en Vigo”. Xurdiu a partir dunha convocatoria en redes sociais o 12 de xaneiro que logrou xuntar a máis de cen persoas nunha primeira asemblea. Agora, despois de meses de traballo, preséntase o nome que terá o futuro centro, A Nubeira, inspirado nos Nubeiros, personaxes presentes na mitoloxía do norte da península, capaces de controlar as nubes, a chuvia e as treboadas. A Nubeira que nace en Vigo faino coa vontade de de “crear un raio luminoso onde nos amalgamar en comunidade”.
Para as persoas impulsoras desta iniciativa, a perda de tercido asociativo e cultural da cidade “nótase especialmente canto máis nos achegamos ao centro da cidade, que está cada vez máis pensado para o turismo e as empresas e menos para a xente que vivimos en Vigo”. Algo no que coinciden desde o colectivo de artistas musicais Grupos de Vigo en Loita, que colabora co evento. Teñen exemplos dabondo: os peches de diferentes locais de ensaio públicos nos últimos anos, como Vigosónico, a Casa da Xuventude ou Súbete ao Castro; ou “as cancelacións de concertos por parte da Policía Local en diferentes puntos da cidade, que agora están afectando ata ao mesmísimo Terraceo”, critican. Tamén reproban a postura do goberno municipal de non incluír bandas locais nas programacións públicas. “O Concello nin sequera cumpriu a súa propia promesa de facer o festival Rock in Vigo de bandas viguesas e galegas como dixeron que farían o verán pasado”, lembra a plataforma.
A xornada de presentación do CS A Nubeira comezará ás 19:00, co bingo a cargo da artista Petra Porter no Tinta Negra. Posteriormente terá lugar a lectura do manifesto do proxecto polas rúas de Churruca. A partir das 21:00 comezarán os concertos na Kominsky, cos grupos vigueses Karracho, Green Poison e Flying Stool, tendo a entrada aos mesmos un prezo de 5€. Estes darán paso, ás 23:30, ás sesións das DJ LVLX, Nahgga e Sofiestas.
Paula Cermeño
Últimos posts de Paula Cermeño (ver todos)
- Extraescolares a calquera idade - 29 Agosto, 2024
- The Wild Fest, TerraCeo, Meu Fest e festas en Zamáns para pechar o mes de agosto - 28 Agosto, 2024
- Volve The Wild Cinema, o festival internacional de cine e ecoloxía de Vigo - 23 Agosto, 2024
- Os vigueses elixen a mellor hamburguesa de España a partir do xoves 22 - 19 Agosto, 2024
- Percorremos os oito novos murais de Vigo Cidade de Cor 2024 - 14 Agosto, 2024