CASAACUNHA

‘Mosca’, de Ártika Cía

Un patio calquera dun colexio calquera. Dúas filas, unha fronte á outra, formando un corredor que hai que atravesar. Un bombardeo de mans baten contra o corpo do neno que pasa correndo polo medio. Berros. Gargalladas. «Mosca! Mosca! Mosca!». Golpes e máis golpes. E, ao final, dor. Dor, impotencia e humillación. Tras A illa da deslembranza, a compañía da sala situada na avenida da Beiramar, Ártika Cía., presenta Mosca, un espectáculo que pon o foco nun dos grandes males do noso tempo: o acoso escolar. Gustavo del Río (Os Náufragos Teatro) escribe e dirixe esta obra que conta a historia de Pedro, un neno de dez anos que, grazas á axuda da familia e do profesorado, trata de saír da espiral de intimidación e angustia en que está atrapado. Fernanda Barrio, Martín Maez e Rocío Salgado configuran o elenco dunha peza que nos fala de afectos e de coidados, pero sobre todo da necesidade de escoitar aquelas persoas que máis o precisen. Con iluminación de Javier Quintana e escenografía de Gustavo Brito, Mosca é un dos pratos fortes da programación escénica deste ano 2023. Unha montaxe necesaria e sen ambaxes que nos recorda que, ás veces, un xogo inocente pode acabar converténdose nun pesadelo.

Data e hora: sábado 11 e domingo 12, ás 20:00 h
Lugar: Sala Ártika
Entradas: 14,00 € (billeteira) / 10,00 € + gastos de xestión (en liña)

Ernesto Is
Escritor

The following two tabs change content below.

Ernesto Is

É dramaturgo, narrador oral e docente. Premio Abrente (ex aequo) con 'Fendas' e Premio Rafael Dieste con 'Despois das ondas'. Foi seleccionado polo INAEM no Programa Dramaturgias Actuales ('El hombre que soñaba con elefantes en las estrellas'), no grupo de escrita teatral DramaturXA do CDG ('Onde veñen morrer as baleas') e na bolsa Nuevas Dramaturgias de Euskadi ('Canciones amarillas para flores tristes'). Cofundador da compañía Feira do Leste, coa que estreou 'Exilio das moscas' e 'Tras Tannhäuser' (axudas á Creación Joven do INJUVE). Membro do consello de redacción da erregueté | Revista Galega de Teatro, colabora tamén coa Revista Grial e A Movida de Vigo.