Lina Rodrigues e Raül Refree presentan o fado como nunca antes o escoitaras
O Festival Underfest xa está aquí, e faino cunha coidada programación que abrangue diferentes estilos e espazos da cidade. Unha destas propostas é a que ofrecerán a cantante portuguesa Lina Rodrigues e o produtor catalán Raül Refree o sábado ás 19:00 no Teatro Salesianos. Tradición e modernidade irán dan man nun recital que nos mostrará o fado como nunca antes o víramos. Aproveitamos a ocasión para falar con Lina sobre este ilusionante proxecto. Merca aquí as túas entradas.
![](https://amovida.gal/wp-content/uploads/2021/10/lina2-1024x683.jpg)
Hai poucos produtores con máis sona nos últimos anos que Raül Refree. Baixo os seus mandos estiveron artistas do nivel de Kiko Veneno, Rosalía, C Tangana, Silvia Pérez Cruz, Rodrigo Cuevas ou Rocío Márquez. Todos eles teñen algo en común máis alá de ter colaborado co músico catalán: o seu gusto pola música tradicional e folclórica. Tanto ten se é flamenco, cançó, canción tradicional asturiana, copla, pasodoble… Raül pode converter en moderna ata a vaixela Duralex da túa avoa.
O fado, pois, era cuestión de tempo: “Eu coñecía a Raül polos seus traballos con Silvia Pérez Cruz e Rosalía, polo que a miña manager chamouno para proporlle adaptar o fado á súa visión innovadora. Tivemos sorte de que collera o teléfono, porque é un home que non acostuma coller as chamadas se non coñece o número” recorda Lina. Así naceu o proxecto e o disco Lina_Raul Refree, unha reinterpretación actual e elegante do xénero luso por excelencia e xeral e do cancioneiro de Amália Rodrigues en particular.
Esta conexión foi inmediata, pois un día Raül foi oíla cantar ao club de fado no que ela acostumba actuar, en Lisboa, e ao día seguinte xa estaban no estudio traballando: “Hai músicos que poden ser moi bos pero cos que non tes esa conexión necesaria para traballar xuntos. Afortunadamente nós si que a tivemos e desfrutamos moito de compartir escenario xuntos”, relata a cantante. O que máis lle gusta de traballar con el, confesa, é a forma na que entende a súa voz, ás súas respiracións, as súas intencións: “Consegue facer que me sinta libre cando canto”, resume.
Esta proposta ibérica está a traspasar fronteiras: Noruega, Eslovenia, Dinamarca, Austria ou Hungría xa cataron este produto gourmet de sabor atlántico. “É marabilloso levar o fado por tantos lugares, estamos a ter experiencias moi boas. Nós sentimos a enerxía dun público que é moi diferente do que ten o fado tradicional. Son persoas que buscan algo diferente, inspirador e que chame a atención ao noso propio interior” explica a cantante lusa.
A diferenza doutras propostas rompedoras, que adoitan ter críticas negativas por parte dos puristas (véxase o primeiro disco de Rosalía), este traballo está a gozar de boa aceptación, segundo Lina. Mesmo gañaron un galardón na primeira edición dos Premios Carlos do Carmo, creado pola Sociedade Portuguesa de Autores. Como se di en Portugal: “primeiro estranha-se depois entranha-se”.
Pablo Vázquez
Últimos posts de Pablo Vázquez (ver todos)
- A viguesa Vanesa Álvarez inicia en Coia un mural de 2400 metros cadrados coa axuda de 170 voluntarios - 23 Xullo, 2024
- Dez libros para coñecer Galicia - 22 Xullo, 2024
- Oito espazos museísticos participan este venres 26 na Noite Branca - 19 Xullo, 2024
- Ed Sheeran bástase el só para coroar o Monte do Gozo - 7 Xullo, 2024
- O Vigo SeaFest volve encher o Náutico de música, gastronomía e actividades mariñas - 2 Xullo, 2024