Ledicia Costas invítanos a camiñar polo Vigo de Verne
Como era de esperar, as prazas para o roteiro literario deste sábado 15 da man de Ledicia Costas voaron en cuestión de minutos. Este paseo parte da súa obra Jules Verne e a vida secreta das mulleres planta, no que se falará do escritor francés, de Sanjurjo Badía e da importancia das cidades na ficción literaria.
- Ledicia falando ante os medios coas áncoras de fondo
- Carmela Silva botándolle un ollo ao libro de Ledicia
- Ledicia Costas explicando o percorrido
- O libro que protagonizará o roteiro
- O Monumento dos Galeóns, unha das paradas do roteiro
- Ledicia Costas, esta mañá no Castro
- Foto de grupo de todos os presentes na comparecencia
Hoxe a viguesa Ledicia Costas, unha das escritoras máis destacadas no ámbito galego e estatal, presentou xunto a outras autoridades o seu roteiro literario nun marco incomparable: no monumento dos Galeóns de Rande, no monte do Castro. Alí, a autora resaltou a importancia deste tipo de iniciativas, idóneas para coñecer mellor a cidade dun mesmo e para ter contacto directo cos lectores e lectoras, e poder así intercambiar opinións sobre a vida e, especialmente, sobre literatura.
O roteiro deste sábado, acompañado en todo momento polas explicacións e anécdotas da gañadora do Premio Nacional de Literatura Xuvenil e Infantil 2015, comezará na fortaleza do Castro. Para a autora é un auténtico privilexio que un autor da talla de Jules Verne visitara a nosa cidade, de aí o motivo deste percorrido polo Vigo verniano e da súa novela, gañadora do Premio Lazarillo no ano 2015.
O camiño continuará polo monumento dos Galeóns de Rande, batalla presente na obra 20.000 leguas baixo dos mares, e continuará polo Campo de Granada ata o Casco Vello. Por alí Ledicia nos guiará pola rúa da Misericordia, rúa dos Sombrereiros e rematará na Praza da Constitución. Todas elas rúas que Violeta, a protagonista da súa novela, percorre continuamente. Ademais, Costas falará da figura de Verne, do empresario Sanjurjo Badía, de submarinos e da importancia das cidades na literatura.
A pesar de que as prazas xa levan un tempo esgotadas, existe a posibilidade de anotarse na lista de espera no caso de que alguén non poida asistir ao roteiro. Unha oportunidade para descubrir outra faciana de Vigo e ver a cidade dunha forma descoñecida ata agora, da man dunhas das referentes da literatura xuvenil.
Pablo Vázquez
Últimos posts de Pablo Vázquez (ver todos)
- 12 festivais para pechar o verán e comezar o outono - 29 Agosto, 2024
- Pantomima Full, La Ruina, Héctor Alterio ou Cayetana Guillén-Cuervo visitan este outono o Teatro García Barbón - 21 Agosto, 2024
- Acampadas, artistas que non son, erros contractuais, músicos vigueses… así foi Castrelos 2024 - 19 Agosto, 2024
- Por que todos os concellos da contorna teñen festivais de jazz e Vigo non? - 6 Agosto, 2024
- Olaia Maneiro (Tanxugueiras): “Moitas das cantareiras populares morreron pensando que non fixeran nada, e fixérono todo” - 1 Agosto, 2024