O Corte Inglés e a Asociación de Celíacos de Galicia (ACEGA) uniron forzas para organizar unha charla informativa sobre esta patoloxía. O evento terá lugar mañá, 21 de maio, ás 19:00 horas, no restaurante – planta 7ª.

A conferencia será impartida por Nuria Colmenero, responsable de restauración e seguridade alimentaria de ACEGA, quen abordará os mitos máis comúns sobre a enfermidade celíaca, así como a correcta elaboración de menús sen glute e a interpretación adecuada da etiquetaxe de produtos. Ademais, ofreceranse recomendacións prácticas para manter unha dieta libre de glute.

A Enfermidade Celíaca (EC) é unha patoloxía autoinmune provocada polo consumo de glute en individuos xeneticamente predispostos, que se manifesta con síntomas clínicos variables.

Segundo a Sociedade Europea de Gastroenterología, Hepatología e Nutrición Pediátrica (ESPGHAN), non existe tratamento farmacolóxico para esta enfermidade, polo que a única opción viable é manter unha dieta estrita sen glute para sempre. Desde a súa fundación en 1998, a Asociación de Celíacos de Galicia (ACEGA) traballa para representar a quen padece a enfermidade celíaca e a dermatite herpetiforme, ofrecendo información, orientación dietética e unha lista actualizada de alimentos aptos para celíacos a través da aplicación móbil FACEMÓVIL.

A entrada á charla é libre ata completar aforo, o que permitirá ao público obter información útil e desmentir falsas crenzas ao redor desta patoloxía cada vez máis coñecida.