RevistaOutubro

Enrique Piñeyro: “Sinto máis presión cociñando que pilotando un avión”

O polifacético artista arxentino Enrique Piñeyro visita esta fin de semana por primeira vez Galicia, máis concretamente o sábado 7 ás 20:30 no Teatro Afundación. Alí presentará ao público vigués o seu espectáculo Volar es humano, aterrizar es divino, un show acedo e divertido que contará cun gran despregamento audivisual. Podes mercar aquí as túas entradas.

Enrique Piñeyro no Teatro Afundación | Pablo V.

Actor, director e produtor de cine, humorista, piloto de avión, comandante dunha línea aérea, médico e mesmo cociñeiro dun restaurante. Só hai unha persoa que encaixe baixo esa descrición, e esa é Enrique Piñeyro. Este xoves pola mañá convidou á prensa a coñecelo persoalmente e charlar un pouco con el, e sen dúbida demostrou que ten moitas cousas que contar. Entro outras, que viu desde Bos Aires nun avión pilotado por el mesmo.

O seu show Volar es humano, aterrizar es divino, ademais de facernos rir, ten como obxectivo demostrarnos o absurdo de terlle medo á voar en avión e o “ridículo e perigoso que é vivir en superficie”. “Os accidentes domésticos, os cans e as persoas provocan moitísimas máis mortes que os avións, por non falar dos coches”, comenta Piñeyro, quen ten unha ristra de estatísticas para corraborar a súa teoría. Unha delas, por exemplo, que no 2017 non houbo nin unha soa vítima en accidentes aéreos, mentres que 235 persoas morreron “cazando Pokémon”.

Banner A Movidiña

Os principais culpables deste pánico xeneralizado a voar son, segundo el, os medios de comunicación e o cinema de catástrofes, “sempre centrados en accidentes aéreos ou en ataques de tiburóns”. “E agora no coronavirus”, comenta sarcástico, e como médico recomenda que “só os contaxiados utilicen mascarilla, xa que ao levala creas unha zona húmida preto na boca que é idónea para que o virus se asente”. A excesiva cobertura mediática do virus débese a que “os xornais teñen que escribir sempre o mesmo número de páxinas, haxa ou non haxa noticias”

Que imos a atopar no espectáculo? Humor negro, personaxes universais e un simulador a escala real da cabina dun avión, que grazas ao despregamento audiovisual recreará un voo de Avianca durante a súa aterraxe en Nova York. A partir de aquí, e grazas á súa experiencia como comandante de liña aérea, a súa formación de médico especializado en aeronáutica e as súas observacións sobre o erro humano, descobre os fallos habituais na comunicación diaria e os contrapón á comunicación aeronáutica.

Preguntado por onde sinte máis presión, se na cabina dun avión ou enriba dun escenario, o artista arxentino responde que cociñando: “imaxina un restaurante cheo en Bos Aires cun pedido tras outro… iso si que é presión”. Semella non haber tema que se lle resista a Enrique Piñeyro.

Missing Event Data
The following two tabs change content below.

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É co-director do documental 'Cuna de Músicos', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo en festivais de cine como o de San Sebastián e Novos Cinemas.
X