Eels, José Mota e o musical de Mecano chegan ao Mar de Vigo este semestre
Despois dun outono cheo de exitosos espectáculos e exposicións o Mar de Vigo prepara novas propostas de primeiro nivel para o primeiro semestre do ano. Dentro destes novos eventos están a liña de musicais, pero tamén haberá cabida para o humor, maxia, bandas tributo e, sobre todo, xiras de grandes artistas internacionais.
As grandes actuacións arrincan este mesmo venres, 27 de xaneiro, coa única parada en Galicia da xira internacional de Macaco, presentando o seu disco Vuélame el corazón. Neste traballo no que colaboran artistas como Tanxugueiras, Leiva ou Fuel Fandango, está a ter unha gran acollida tanto pola crítica coma polo público. O cine tamén estará presente na programación ao día seguinte co concerto da Film Symphony Orchestra o 28 de xaneiro. Coas entradas a piques de esgotarse, KRYPTON homenaxea as bandas sonoras das películas de heroes e superheroes: Superman, Los Vengadores, Braveheart ou El Último Mohicano, a Film Symphony Orchestra interpretará pezas míticas de John Williams e James Horner, entre outros.
As xiras internacionais de artistas de primeiro nivel serán un dos pratos fortes do Auditorio neste primeiro semestre, coas actuacións de Eels (29/04; aprazou o ano pasado pola pandemia), Steve Vai (04/04; xa actuou neste recinto en xullo de 2022), Salvador Sobral (25/03; tamén pasou pola terraza do auditorio o pasado verán), Kevin Johansen (04/02) Ana Moura (24/02). Un dos concertos máis esperados é o da agrupación norteamericana Eels, a gran banda de rock independente liderada por Mr. E. Visitan Vigo por primeira vez para presentar o seu último traballo, Extreme Witchcraft, na que será a súa única data en Galicia o29 de abril. Para coñecer máis sobre esta banda e o seu líder recomendamos a lectura das súas memorias Cosas que los nietos deberían saber, publicadas en castelán por Blackie Books.
Os musicais continuarán a ser outra das apostas máis fortes da programación, onde destaca o musical Cruz de Navajas, El Último Mecano, un dos eventos máis importantes que acollerá o recinto do 19 ao 21 de maio, con 4 funcións programadas. Unha homenaxe ao mítico grupo español Mecano que xa viron máis de 150.000 espectadores en Madrid, con 25 artistas sobre o escenario e cunha espectacular compoñente audiovisual. Dentro dos musicais, o Mar de Vigo continuará apostando polas citas familiares. O explorador máis intrépido e divertido visita o auditorio o 11 de marzo con Tadeo Jones, el Musical. O personaxe de animación cobra vida con voces en directo cunha innovadora posta en escena a través de videomapping. Por outra banda, Colombia Mi Encanto chega o 2 de abril, un musical cun elenco de dez artistas que rinde homenaxe á película de Disney Encanto con cancións da súa banda sonora e temas do folclore colombiano que farán cantar e bailar a grandes e pequenos.
O humor será outra das opción de programación, na que estarán algúns dos cómicos nacionais máis destacados. Os días 10 e 11 de febreiro chega Paz Padilla con El Humor de Mi Vida, unha historia autobiográfica na que a cómica conta as súas vivencias coa súa parella dende que se coñecesen ata o seu pasamento, en clave de humor. Pouco despois, o 25 de febreiro, visítannos tres amigos e grandes humoristas: Flo, José Mota e Santiago Segura. En El Sentido del Humor, estes tres cómicos reflexionan sobre o que nos fai rir hoxe en día. Ademais do humor, a maxia do gran espectáculo de El Mago Yunke, tamén pasará polo Mar de Vigo durante dous días, o 10 e 11 de xuño.
Finalmente, a programación tamén contará con dos atractivos espectáculos de bandas tributo. Os seguidores de Coldplay e de Queen están de sorte: o 23 de febreiro actuará Queen Tribute, unha homnaxe á banda británica con Dean Richardson á voz; e os días 2 e 3 de marzo será a quenda de Coldplace, A Coldplay Experience, a banda británica que recrea os espectáculos orixinais do grupo de Chris Martin ata o máis mínimo detalle. A única agrupación avalada polos propios Coldplay.
As entradas para todos os espectáculos están á venda a través de www.teuticket.com.