Don Marco, pizza da ‘bella Napoli’
Visitamos Don Marco, é un restaurante italiano no que as pizzas se cociñan seguindo a receita napoletana, as pastas son caseiras e cheas de sabor e as sobremesas non pasan desapercibidas. Aquí todo se cociña sen présa e utilizando ingredientes de calidade importados do país da bota. Un pedaciño de Italia e Vigo que paga a pena coñecer e repetir.
Está nos albores da fast food, cómese en todo o mundo e admite versións (e perversións) inimaxinables. Estamos falando da pizza, un alimento tan humilde como apetecible que poderíamos resumir como a combinación básica de pan, tomate e queixo. A pesar da sinxeleza e popularidade, que complicado resulta atopar en Vigo (e en calquera cidade fóra de Italia) restaurantes onde non se converta a simplicidade en desgana.
Por sorte, existe un lugar na nosa cidade no que a tradición italiana se respecta con afán e no que é imposible non soltar un mamma mia! a cada bocado. Á fronte de Don Marco encontramos a –sorpresa!– Marco, un galego que despois de traballar en diferentes restaurantes en Italia quixo regalarnos un pouco do saber aprendido no país da bota. A experiencia reflíctese nunha masa exquisita e unha selección de ingredientes de importación cos que coroa este manxar.
Aquí cocíñase pizza napolitana en formato individual. Unha variedade redonda, de base fina e bordos avultados. A masa napolitana é máis lixeira que as variedades clásicas e implica un tempo de fermentación de dous días no que non se engade lévedo. Sobre este soporte de primeira categoría, o equipo de Marco coloca ingredientes de gran calidade na medida xusta, fuxindo das toneladas de queixo e friames que impiden apreciar o elenco de sabores. «O 90 % das materias primas vén de Italia: os queixos, a crema de trufa, os salames…», explica o hostaleiro. O resultado cocíñase nun forno de gas, «como fan hoxe en día na maioría de restaurantes italianos», que chega ata os 400 grados, necesarios para que a masa quede crocante e o queixo fundido en apenas cinco minutos e o resultado nos teletransporte á bella Napoli.
Don Marco non é só unha pizzería, pois aquí sérvense outros pratos típicos da República Italiana. Destacan as pastas frescas, elaboradas no propio restaurante, como os pappardelle gamberoni, os canelóns con ricotta e espinacas , os pappardelle con crema de cabaza e xamón crocante. Tamén atopamos atractivos colofóns doces, como a torta banoflee, o auténtico tiramisú ou a exquisita panna cotta con pistachos.
Buon appetito!
Rúa do Médico José Mato, 12
986 63 15 18
IG: @donmarcopizza
donmarcopizza.com
Paula Cermeño
Últimos posts de Paula Cermeño (ver todos)
- Extraescolares a calquera idade - 29 Agosto, 2024
- The Wild Fest, TerraCeo, Meu Fest e festas en Zamáns para pechar o mes de agosto - 28 Agosto, 2024
- Volve The Wild Cinema, o festival internacional de cine e ecoloxía de Vigo - 23 Agosto, 2024
- Os vigueses elixen a mellor hamburguesa de España a partir do xoves 22 - 19 Agosto, 2024
- Percorremos os oito novos murais de Vigo Cidade de Cor 2024 - 14 Agosto, 2024