REVISTA ABRIL

Comer e beber en Baiona

Publicado o por

Baiona e a súa contorna contan con atractivas opcións para comer e beber entre concertos: Cacicato, la Pepita, Pénjamo e beber en Oniria.

Cacicato – Rúa Ventura Misa, 15

@restaurante_cacicato

Terraza ampla no casco vello e horario de 9 da mañá ata rematar o turno de ceas. Cacicato é un asador e marisquería moi recomendable para darse unha homenaxe con pratos tan fastosos como a mariscada en bandexa de 1 metro, as carnes e peixes á grella, ou un arroz en paella con produtos do mar. Tamén contan con opcións para picar, como as táboas de queixos e embutidos, as croquetas e a tosta de mus de berenxena. Despois de cantar e botar cos teus grupos favoritos, ben mereces repoñer forzas por todo o alto e onde mellor que no restaurante con maior puntuación en Tripadvisor de Baiona.

La Pepita – Rúa Elduayen, 21

@lapepitaburguer

A primeira hamburguesería galega en afastar o famoso entrepán da comida rápida e alzalo á categoría gourmet. Ademais de entrantes e ensaladas na carta de La Pepita atopamos trece hamburguesas de carne á grella con opción vegana. A Sorrentina, con mozzarella e tomate seco, conta cunha lexión de fans que tamén devecen pola potencia da Chaparrita, con guacamole, touciño e jalapeños; ou a melosidade da Rouge, con foie e mazá caramelizada.  Saboreala sen présa no local do paseo marítimo é aconsellable, pero tamén podemos pedila para levar ou que nola traian a través de Glovo.

Pénjamo – Rúa Cansadoura, 29. Praia de Patos

@penjamopatos

Unha das terrazas con máis historia e ambiente da coñecida praia de surfistas fará un oco nas súas cociñas ás hamburguesas de La Pepita a partir deste verán. Unha simbiose perfecta na que a música, as vistas sobre as Cíes e a carta de cócteles e bebidas acompañan ás hamburguesas premium de carne de tenreira á grella. O xute de enerxía perfecto para facer un alto no festival.

REVISTA ABRIL

Oniria – Ventura Misa, 29

@oniria.baiona

Para empezar ou acabar a noite, este pub do centro da vila ofrece unha coidada carta de bebidas, con cafés, cañas e cócteles desde ás 19:00 h ata as 4 da mañá. Cócteles clásicos como daikiris, piña colada e mojitos son elaborados no momento na barra de Oniria, onde tamén preparan especialidades propias como os cócteles de sidra e cervexa. Entrada a noite, o ambiente relaxado convértese en festivo, coa presenza de picadiscos cada xoves. O 25 de agosto estará David Correa na cabina, mentres que o 1 de setembro será o dj baionés con proxección internacional Yaggo quen anime a festa.

The following two tabs change content below.

Paula Cermeño

Paula Cermeño é licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado avistala en moitos dos saraos vigueses.