Bouzas convértese no barrio do amor con ‘Eu Namorei en Bouzas’

Publicado o por

Eu Namorei en Bouzas é o nome da exposición que recolle en 150 fotografías parellas de todo tipo e idade con algún tipo de vínculo co barrio vigués. Poderá visitarse do 7 ao 29 de setembro, de luns a sábado, na histórica Casa do Patín.

Desde agora ata que finalice o mes poderemos visitar a exposición fotográfica Eu Namorei en Bouzas, unha homenaxe ao amor e a un barrio que marcou a vida de decenas de parellas. A mostra estará dispoñible na recén restaurada e infrautilizada Casa do Patín, en pleno corazón de Bouzas.

Este proxecto naceu fai aproximadamente un ano, e a pesar de que nos seus inicios non contou cunha gran acollida, pouco a pouco a xente foi deixando de lado os complexos e compartiu coa Asociación Cultural da Vila de Bouzas as súas fotos. Especialmente os máis maiores, para os que as súas fotos de voda e de noivos son un auténtico tesouro. Así, a foto máis antiga que poderemos atopar na mostra data de 1900. As décadas máis documentadas son as comprendidas entre 1940 e 1960 mentres que, curiosamente, apenas atopamos fotografías actuais, tempos nos que acumulamos máis e máis imaxes.

Quizais moitas das fotografías non destaquen pola súa estética, xa que a maioría son de carácter doméstico. O especial deste grupo de imaxes é o seu valor sentimental e a historia que hai detrás de cada unha delas, especialmente das máis antigas, que foron escaneadas e devoltas aos seus donos. Bouzas pode estar presente nas fotografías ou simplemente ser parte do contexto delas: as instantáneas non teñen porque estar sacadas neste barrio, senón que chega con que algún membro da parella nacese ou vivise alí, ou que ambos se coñecesen neste emblemático lugar.

A presentación, que tivo lugar o venres 7 ás 19:30, estivo cargada dunha gran emotividade, ao estar presentes nela moitas das persoas retratadas nas imaxes e os seus familiares. Catro membros da Orquestra Clásica de Vigo foron os encargados de poñer a banda sonora a esta especial velada que ten ao amor e a Bouzas como os seus protagonistas principais.

01xan00:0000:0000:00 - 00:00(GMT+01:00) Casa do Patín

REVISTA NOVEMBRO
The following two tabs change content below.
My LinkedIn profileMy Vimeo channel

Pablo Vázquez

Xornalista cultural, fotógrafo e musiqueiro. E vigués. Director de tres documentais e coautor de Son da cidade. O libro da música viguesa do noso século.

Publicaciones relacionadas:

  1. Mónica Bernández e Miguel Lima: «O galego fai barrio e o barrio fai galegofalantes»
  2. Estas son as ArtistAs de Davida no barrio de Bouzas
  3. Vigo convértese na capital galega do feminismo
  4. Vigo convértese na capital do piano a partir deste venres