Bembrive comeza a prepararse para San Brais 2020
Queda pouco menos dun mes para o día grande de San Brais, mais en Bembrive xa van poñendo en marcha a maquinaria con moitos dos seus furanchos xa operativos desde esta fin de semana. Algúns deles, ademais de dar a benvida con bebida e comida en abundancia, tamén contarán con actuacións musicais.
![](https://amovida.gal/wp-content/uploads/2020/01/ocne-upon.jpg)
Aínda que o día de San Brais é realmente o 3 de febreiro, a festa xa vai comezando pola zona de Bembrive, onde os furanchos comezan a abrir as súas portas. De feito, hoxe xa son uns cantos os que dan a benvida a esta tradicional celebración: Endulza tu Vida, A Blasa, O Pataquiño, o Marqués, O Chivo, A Cabaña das Meigas, A Botica de Toñito ou O Castelo son algúns dos que poderás atopar abertos.
A música folclórica é outra da señas de identidade desta festa, e poderemos atopala no Endulza tu Vida co grupo Xiada, no Castelo con Os da Curva, no Pataquiño con Nós, os Outros ou na Blasa o sábado con Abóbriga. Estas son só algunhas das actuacións confirmadas para esta fin de semana, pero de seguro que haberá moita música de imprevisto.
Hai uns días que coñeciamos o cartel non oficial deste ano, creado polo deseñador Juan Carlos Lago. Nel, aproveitando o tirón mediático do filme de Tarantino Once Upon a Time In… Hollywood, “sanbraisiza” aos seus dos protagonistas, Leonardo di Caprio e Brad Pitt, colocándolles elementos típicos como a boina, o escarvadentes na boca, a botella de tinto, a pandeireta ou a camisola de San Brais. De fondo podemos ver, tras o barrís de viño, a xigantesca nora de Vigo e as típicas letras de Hollywood, que esta vez nos dan a benvida ao barrio vigués.
A continuación unha listaxe provisional dos furanchos que poderemos atopar abertos desde esta fin de semana:
- Furancho María
- Furancho O Castelo
- Furancho dos Falperros
- Furancho A Blasa
- Furancho O Marqués
- Furancho Os da Rianxeira
- Furancho O Bombeiro
- Furancho O Chivo
- Furancho Toma ya!
- Furancho A Botica de Toñito
- Furancho Endulza tu Vida
- Furancho O Neno
- Furancho Chicha
- Furancho do Medio
- Furancho Celtas
- Furancho Cabaña das Meigas
- Furancho O Pataquiño
- Furancho O Submarino