RevistaOutubro

Babykatze: “Paréceme moi linda a oportunidade de poder usar as instalacións dun lugar tan bonito”

A arxentina Babykatze é un dos novos nomes que atoparemos este sábado no Museo do Mar. Tras probar como batería e guitarrista en diferentes agrupacións, agora busca un son máis persoal a través da electrónica.

Babykatze no Flop Festival de Pontevedra | Beatriz Ciscar

Como definirías o que fas a alguén que non che coñeza?

Sempre me custa moito definir o estilo musical, eu síntoo como unha especie de pop electrónico con elementos witch house, faime lembrar a Crystal Castles, Grimes. Desde un punto de vista máis global, é unha representación de ideas que están moi presentes na miña mente e que teñen que ver co crecemento persoal, o  autocoñecemento, a percepción de nós mesmas, diálogos internos e sentimentos que resultan difíciles de entender, especialmente cando hai moita desconexión entre o que é e o que cremos que debería ser.

Como e cando nace o teu proxecto musical?

Aos 16 empezoume a interesar a música e fun pasando por distintas bandas, tocando a guitarra e a batería, ata que sentín que necesitaba facer algo moito máis persoal e que tiña ganas de desenvolvelo enteiramente de principio a fin. No 2014 un amigo ensinoume a usar o Ableton Live e ameino, empecei a experimentar moito con esta forma de facer música que era moi nova para min e da pouco foise definindo un estilo máis concreto.

Que che parece esta iniciativa de Vigo Emerxe?

Paréceme súper necesaria, unha forma de darlle un lugar á escena artística emerxente de Vigo no programa cultural da cidade. Paréceme moi linda a oportunidade de poder usar as instalacións dun lugar tan bonito como o Museo do Mar de Vigo, que doutra forma sería moi difícil de conseguir para artistas emerxentes, e que o evento sexa gratis para que o que queira póidase achegar e coñecer proxectos xestados nesta cidade, onde hai xente facendo cousas moi interesantes e que non sempre ten un espazo para compartilas.

Que outros artistas locais gustaríache ver no festival?

Encantaríame ver Cult of Auspex, Alicia Carrera, Tulip, Pálida, Lupita Hard e Yugen Kala, por nomear algúns.

Que opinas da escena musical local?

Banner A Movidiña

Ás veces sinto que se fai difícil levar adiante propostas que se saian un pouco do habitual, pero por sorte segue habendo locais como Radar Estudios e La Fábrica de Chocolate Club que apostan por traer proxectos diferentes e actuais moi interesantes.

Proxectos para este ano e o que vén.

Ata o de agora,  BABYKATZE era unha vía de escape onde envorcaba todo o que me saía dunha forma máis experimental. Este ano empecei a estudar son e estoume dedicando a producir e compoñer cousas novas cunha dirección máis definida. Quero seguir expandindo o concepto de  BABYKATZE a outras áreas, desenvolver máis a parte visual e estética, traballar no directo desde un enfoque máis multidisciplinar. Facer que sexa unha experiencia máis completa, un universo coa súa propia lóxica e a súa propia linguaxe.

X