As entradas para o concerto de Muse en Balaídos saen á venda este venres
As entradas para o que posiblemente sexa o concerto máis esperado deste verán xa teñen data de saída. Falamos de Muse, que actuará o próximo 8 de setembro no Estadio Municipal de Balaídos, acompañado polas bandas Years&Years e os locais The Killer Barbies. Os abonados ao RC Celta poderán acceder a unha preventa especial mañá mesmo, xoves.
![](https://amovida.gal/wp-content/uploads/2022/07/BalaidosMuse_2.jpg)
Hoxe houbo unha presentación sobre o céspede de Balaídos, pero para desgraza dos seareiros do Celta non foi a de ningún crack do balón. A banda de rock británica Muse será a fichaxe estrela deste verán, xa que por fin é oficial que actuará o próximo xoves 8 de setembro no estadio vigués. O último concerto que albergou este recinto deportivo foi o de Alejandro Sanz en 2001, hai 21 anos. Antes, por aí pasaron artistas da talla de Madonna, Rolling Stones ou Dire Straits.
Os británicos nos estarán sós. Abrirá a velada ás 20:00 a banda local The Killer Barbies, iconos do punk rock noventeiro vigués. Unha hora despois chegará o trío londinense de electrónica Years&Years, decisión peculiar tendo en conta que a estrela da noite é unha banda de rock. Sobre as 22:15 subirán ao escenario situado no fondo actualmente en obras (antiga grada de Marcador) Muse, o trío formado por Matt Bellamy, Christopher Wolstenholme e Dominic Howard.
Como conseguir as entradas? O público xeral poderá adquirilas a partir deste venres ás 10:00 nas páxinas web de Live Nation e Ticketmaster por un prezo único de 65€, tanto en grada como en pista. O aforo total será de 15.000 persoas, aínda que esperan poder aumentalo en 3000 ou 4000 máis de realizarse unhas pequenas obras no estadio. A organización quixo ter un detalle co Celta e os seus seguidores, polo que mañá, xoves 28, abrirase unha preventa só para abonados do Celta nesta tempada 22-23, a do centenario. O total de entradas dedicado a este sector será de 5000. Todos os abonados xa deberían ter un correo electrónico do clube na bandexa de entrada que explica como facerse cos billetes.
![](https://amovida.gal/wp-content/uploads/2022/05/muse-2-1024x576.jpg)
Pablo Vázquez
Últimos posts de Pablo Vázquez (ver todos)
- A viguesa Vanesa Álvarez inicia en Coia un mural de 2400 metros cadrados coa axuda de 170 voluntarios - 23 Xullo, 2024
- Dez libros para coñecer Galicia - 22 Xullo, 2024
- Oito espazos museísticos participan este venres 26 na Noite Branca - 19 Xullo, 2024
- Ed Sheeran bástase el só para coroar o Monte do Gozo - 7 Xullo, 2024
- O Vigo SeaFest volve encher o Náutico de música, gastronomía e actividades mariñas - 2 Xullo, 2024