VIALIA
bannerPicnicSesions

Armadiña Rock, o festival que naceu dun ascenso

Publicado o por

Esta fin de semana bota a andar unha nova edición do Armadiña Rock, un dos poucos festivais galegos gratuítos e organizados por unha asociación cultural. Falamos con Almudena Acuña, tesoreira e coordinadora do festival, para coñecer máis a fondo este evento, o resto de actividades que realizan ao longo do ano e a curiosa historia que hai detrás do nacemento desta asociación.

Parte da organización do Armadiña Rock 2017, con Almudena Acuña de terceira pola esquerda | Cedida

Rock e moito baile e o que nos agarda en Combarro do 26 ao 28 de agosto da man de artistas como Desakato, La Quinquillada, Tremenda Jauría, Sofía Gabanna ou Reincidentes. Todo isto de balde e con acampada tamén gratuíta. Detrás deste evento atopamos á Asociación Cultural Deportiva e Medioambiental Armadiña, nada hai máis de dez anos a raíz do ascenso a Segunda Autonómica en 2009 do equipo de fútbol local, o SD Combarro: “Organizaron unha festa polo ascenso que tivo moi boa acollida e dous anos despois decidiron montar a Asociación”, cóntanos de oídas Almudena Acuña, tesoreira e coordinadora do festival, xa que daquelas era aínda moi nova. Os dous primeiros anos a organización correu a cargo do clube, mais no 2011 xurde a Asociación que leva o nome do campo onde disputaba o SD Combarro os seus partidos como local, o Armadiña.

REVISTA ABRIL

O equipo de fútbol xa non existe desde 2014, mais a Asociación foi medrando co paso dos anos ata chegar aos máis de 400 socios que ten na actualidade, a súa gran maioría de Combarro e do resto do municipio de Poio. “Temos un amigo que veu traballar aquí desde Turquía que lle gustou a movida e se fixo socio”, conta como curiosidade Acuña. Para a programación do Armadiña Rock, as persoas asociadas ofrécense voluntarias para formar unha comisión do festival. Nas reunións periódicas propoñen bandas que se axusten “á esencia Armadiña” e realizan escoitas colectivas das que van saíndo as escollas definitivas: “Ao principio eran máis ben grupos de rock, pero agora imos metendo un pouco de todo: reggae, ska, hip hop…”, indica a coordinadora deste ano, que destaca a presenza de Tremenda Jauría, unha agrupación que mestura cumbia, reggaeton, punk e electrónica. “Cando estas sesións son o sábado pola noite sacamos o licor café e escollemos moito mellor”, confesa Almudena entre risos.

Voluntarios do Armadiña Rock 2018 | Cedida

Segundo ela, senten un apoio total da veciñanza: “Para eles é un dos eventos máis importantes do ano en Combarro e sempre nos botan unha man en todo o posible”, agradece. De feito, no festival atoparemos 60 voluntarios, todos socios da ACDM Armadiña, que ademais de pagar a súa cota deciden axudar no transcurso do evento. Tamén o Concello de Poio decidiu apostar polo festival ao ver que era un proxecto sólido e serio e que non era “cousa de tres días”. O Armadiña sempre destacou pola súa aposta pola música en galego, como demostran os seus carteis ao longo dos anos: “É a que nos gusta e queremos que os rapaces pequenos se impliquen con ela, que vexan que a música galega tamén mola”, conclúe Acuña. Xa a título persoal, Almudena destaca como a maior sorpresa da historia do festival a banda bosnia Dubioza Kolektiv e gustarialle ver sobre o escenario combarrés a Boikot, Txarango ou Berri Txarrak, aínda que estes últimos levan de parón indefinido desde 2019: “Quedounos unha espiniña cravada con eles”, conta con tristura.

Ledicia de artistas e público no Armadiña Rock 2018 | Cedida

Ademais do Armadiña Rock, a Asociación leva a cabo outras moitas actividades ao longo do ano. Desgrazadamente, este 2022 non terá lugar o Curtas Armadiña, un festival de cinema que celebrou a súa última edición en 2019, antes da pandemia. O que si están a facer é un proxecto de museo para Combarro que, como é lóxico, levará un tempo constituír. Desde o ano pasado están a realizar a Semana do Museo, onde expoñen á cidadanía distintas temáticas relacionadas coa vila, como a relación entre a muller e o mar, as conserveiras da contorna ou os cambios que sufriu Combarro ao longo dos anos utilizando fotos antigas como comparación. “É o proxecto máis grande que temos agora entre mans”, sintetiza Almudena.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.