‘Antes de nós’, o filme sobre Castelao, abrirá o XXII Festival de Cans
A película Antes de nós, dirixida por Ángeles Huerta, será o filme de apertura da XXII edición do Festival de Cans, que este ano celébrase entre o 20 e o 24 de maio. A estrea estará arroupada pola directora e polos actores protagonistas Xoan Fórneas, Cris Iglesias e Nancho Novo, entre outros. Xa están a venda 200 packs en oferta de lanzamento por só 22 euros ata o 27 de abril
O Festival de Cans presentou este mércores en conferencia de prensa no Café de Altamira de Santiago de Compostela a súa sesión de apertura e a súa imaxe gráfica para a edición XXII do certame, deseñada por Pablo Rodríguez, do equipo de Rei Zentolo. “Botamos moito de menos á señora Alicia, que por primeira vez non nos acompaña na presentación, pero seguro que a lembraremos no festival de forma especial”, manifestou Alfonso Pato, director do festival.
Antes de nós, protagonizada por Xoan Fórneas, Cris Iglesias, Nancho Novo e Miquel Insua, e participada por CRTVG é un retrato íntimo e emocional de Castelao. A historia centrarase en dous momentos clave da súa vida: o seu labor como médico durante a pandemia de gripe de 1918 e a viaxe a Bretaña en 1929 coa súa esposa, tras a dolorosa perda do seu fillo Chuchiño.
A directora, Ángeles Huerta, salientou a súa relación emocional con Cans, festival onde se proxectaron por vez primeira as súas curtas, onde obtivo o seu primeiro premio e que sente “como un fogar”. Huerta subliñou a “ilusión” de presentar en Cans Antes de nós, a súa terceira longametraxe despois de Esquece Monelos e O corpo aberto. “Unha figura como Castelao sempre vai suscitar polémica. É unha representación da Galicia que puido ser e non foi. O filme ten unha mirada moi feminina e feminista e é diferente a ollada que se verteu tradicionalmente sobre Castelao”, apuntou a directora.
A proxección da película terá lugar no serán da xornada do xoves 22 de maio no Círculo Recreativo e Cultural (CRC) do Porriño, e contará coa presenza en Cans da súa directora Ángeles Huerta e dos actores protagonistas Xoan Fórneas, Cris Iglesias e Nancho Novo. A mañá do xoves o equipo do filme fará un encontro co público no Torreiro de Cans, epicentro do festival, e antes da proxección haberá un desfile honorífico en chimpín.
Imaxe gráfica vinculada a Castelao
Pablo Rodríguez, deseñador de Rei Zentolo, explicou que “a inspiración da grafica do cartaz foron as pequenas ilustracions de Castelao para cabeceiras da revista Nós. Castelao coma deseñador gráfico tirou moito destas formas enmarcadas, moi saturadas de gráfica, e moitas veces con elementos que inspiran movemento ou directamente secuencias. Pertence á súa primeira época, e, malia que a min sempre me gustaron moito, dentro da obra de Castelao son “obras menores” (coma as curtas) .. por iso pensei en que encaixaban en Cans”.
