85 Corpos, un festival para que celebres o Día da Danza bailando
O colectivo 85C celebra o Día da Danza como non podería ser doutra maneira: bailando. 85 Corpos desenvolverase nas xornadas do sábado e o domingo e combinará diferentes disciplinas de danza para que todo o mundo se anime a participar.
O Colectivo ‘Os Movementes’ será o encargado de guiar a jam de contact que se celebrará o domingo no Alamacén Cultural | 85C
O domingo, 29 de abril, ten lugar o Día da Danza e en Vigo se están a organizar diferentes iniciativas para que movas o esqueleto. O colectivo multidisciplinar 85C ten preparada unha fin de semana de moito baile para que bailaríns e afeccionados deixen fluír os seus corpos ao ritmo de diferentes músicas. Baixo o título de 85 Corpos englóbanse tres eventos que terán lugar nas xornadas do sábado e o domingo.
A primeira cita será ‘Sinerxia de Artistas’ que se celebrará o sábado na Cova dos Ratos a partir das seis da tarde. Neste evento actuarán oito dúos creados de forma aleatoria. Cada un dos dúos estará formado por un bailarín e por unha persoa que se dedica a algunha outra arte: poesía, teatro, muralismo… A organización xa comunicou aos diferentes participantes quen é a súa parella por se quixeran preparar algo en conxunto antes do evento do sábado. A entrada para asistir a esta peculiar proposta é de balde, ao finalizar se abrirá un coloquio no que os participantes poderán compartir a súa experiencia.
Ese mesmo día a partir das doce da noite, terá lugar na sala Magnética a Macarena War III, a primeira batalla de baile na que non fai falla saber bailar para participar. Esta proposta, ao igual que a anterior, desenvolverase por parellas formadas por un bailarín ou bailarina profesional e unha persoa á que simplemente lle guste bailar. Tanto uns coma outros pódense inscribir previamente no evento contactando con Beehive Vigo, pero os indecisos tamén se poderán arrancar a participar no mesmo momento do evento. O evento será dinamizado pola speaker High Paw e os DJs Fonkid e DJ Pol e haberá un xurado que escolla a parella gañadora.
O domingo 85C ten preparada unha intensa xornada de jams nas que todo o mundo está convidado a participar. As jams estarán guiadas por bailaríns das diferentes disciplinas, polo que, independente do nivel de cada un, a participación é aberta, só se precisan ganas de mover o corpo. As jams matinais terán lugar no Alamacén Cultural. A xornada arrancará ás 11 da mañá cunha jam de contact en colaboración con ‘Os Movementes’, guiada polo bailarín Juan Cid e musicada por Charles Rapante. Ás 12:30 chegará a quenda dos afeccionados ao swing e o lindy hop, esta sesión será guiada por Swing On Vigo e a Dj Elena Branco será a encargada de pór a música.
Pola tarde as jams trasladaranse a Escola de Danza Inés Núñez. O evento comezará cunha sesión de danza africana a partir das 16:30 horas que será guiada por Allatantou e na que haberá percusión en directo. Ás seis da tarde, darase paso ás danzas urbanas, o colectivo Rías Baixas será o encargado de guiar esta jam e a música correrá a cargo de Mma Bomwas. A xornada pecharase cunha jam conxunta na que tódalas danzas serán benvidas, dende a organización animan aos participantes a que leven as súas propostas musicais. O prezo por participar nunha das jams é de 3€, en dúas 5€ e tamén hai a posibilidade de mercar un bono para tódalas jams por 10€.
Últimos posts de Tamara Novoa (ver todos)
- Ledicia Costas: «O humor e a infancia moven o mundo» - 25 Outubro, 2024
- Mariña López: «O museo da industria conserveira non debería estar no monte» - 29 Agosto, 2024
- Villa Idalina, pícnic privado con vistas ao Miño - 12 Xuño, 2024
- Ailén Kendelman: «A través do humor podemos saír de situacións dolorosas» - 28 Maio, 2024
- Bruno Arias: «A xente está decatándose de que unha película en galego pode ser boa» - 25 Abril, 2024