FLIV, a feira dixital do libro galego
Nace en Galicia unha iniciativa pioneira para a difusión da nosa literatura, un festival dixital no que haberá espazo para presentacións, recitais, contacontos, concertos e mesas redondas con autores asentados e emerxentes de xéneros variados. A cita é os días 26 e 28 de xuño no portal web www.fliv.ga
![](https://amovida.gal/wp-content/uploads/2020/06/FLIV.jpg)
Os encontros entre a cultura e o mundo virtual seguen acontecendo pese a apertura de man respecto aos lugares que podemos visitar. As redes sociais e as videochamadas están tomando o lugar dos encontros multitudinarios prepandemia, ben sexa para paliar os seus efectos ou como iniciativas a longo prazo. Vemos pasar polas pantallas festivais escénicos, música de todo tipo, charlas, late shows e agora tamén libros, a través do FLIV, un festival literario que ‘busca aproveitar as vantaxes da telemática para poñer en comunicación a autores e lectores‘.
O Festival Virtual do Libro da Galiza (FLIV) é unha iniciativa organizada pola escritora e xestora cultural Anna R. Figueirido, xunto a Fervenzas Literarias e a empresa Datalib e conta co apoio da Secretaría Xeral de Política Lingüística. As organizadoras vén nas ferramentas dixitais unha oportunidade para amosar a riqueza da nosa produción escrita e lograr que a literatura galega trascenda no espazo e tempo. Estes contidos permanecerán na web e seguirán sendo accesibles unha vez pasadas as datas do festival, atopando un beneficioso equilibrio entre o contacto inmediato entre autores e público e a perdurabilidade no tempo. É por isto que o FLIV nace con vontade de perdurar nos vindeiros anos, sen intención de substituir ás feiras presenciais.
O programa completo presentarase ao longo desta semana, mais no portal da iniciativa xa podemos ler nomes de autores vigueses, como Domingo Villar, Pedro Feijoo, Francisco Castro e Ledicia Costas e outra ducia de galegos, como Marilar Aleixandre ou Berta Dávila. Tamén está prevista a participación ods axentes arredor do libro, as bibliotecas e librerías e os colectivos que se moven en Galicia arredor da literatura.
En canto a temática, Figueiredo asegura que o FLIV ‘fará un repaso por todos os xéneros literarios: novela, ensaio, poesía, teatro e literatura infantil e xuvenil, sen descontar o cómic ou a presenza doutras literaturas na literatura galega por medio da tradución’ e que tamén se incluirán actividades específicas sobre Carvalho Calero, homenaxeado nas Letras Galegas 2020.
Paula Cermeño
Últimos posts de Paula Cermeño (ver todos)
- Extraescolares a calquera idade - 29 Agosto, 2024
- The Wild Fest, TerraCeo, Meu Fest e festas en Zamáns para pechar o mes de agosto - 28 Agosto, 2024
- Volve The Wild Cinema, o festival internacional de cine e ecoloxía de Vigo - 23 Agosto, 2024
- Os vigueses elixen a mellor hamburguesa de España a partir do xoves 22 - 19 Agosto, 2024
- Percorremos os oito novos murais de Vigo Cidade de Cor 2024 - 14 Agosto, 2024