Antón Veiga leva ao cine a obra de Diego Giráldez
Esta semana estase a rodar en Porriño Para sempre, Málevich, unha curta baseada nun libro do escritor galego Diego Giráldez. O proxecto está comandado por Antón Veiga, con quen falamos para que nos conte a orixe e o proceso creativo que hai detrás desta emocionante iniciativa audiovisual.
![](https://amovida.gal/wp-content/uploads/2020/02/CameodeDiegoGiraldez.jpg)
Existen moitos escritores que teñen unha maneira de contar as súas historias no papel máis próxima ao cine que á literatura máis tradicional. É o caso de Diego Giráldez, ou polo menos iso é o que notou Antón Veiga en Galería de Saldos, o libro do autor porriñés no que se baseou para realizar a curta Para sempre, Málevich: “o seu xeito de describir as escenas, as accións, o seu universo persoal, sempre nos pareceu que pedía levalo a imaxes. É un exemplo de nova literatura galega, que bebe da linguaxe cinematográfica, e que resultaba moi natural para percorrer o camiño contrario”.
Concretamente, a curta versa sobre unha das historias deste libro polo “seu potencial como historia pechada”, mais atoparemos numerosas referencias e cameos de personaxes do resto de relatos. “Queremos que se cree un diálogo entre o libro e a curta“, comenta Veiga, que deixará “ovos de Pascua” como agasallo para os que leron o libro completo.
Preguntado por se Diego Giráldez interviu na creación do guión, Veiga recoñece que tivo “total liberdade por parte del. De feito, non leu o guión ata que non estivo totalmente pechado. E a súa resposta non puido ser máis positiva, emocionouse“. Ademais, o propio escritor terá un pequeno papel que sirve de “homenaxe ao creador deste universo tan fascinante”.
O filme pretende ter unha forte vertente social e inclusiva, xa que a historia versa sobre un marchante de arte cego. Polo tanto, “o máis honesto pareceunos procurar un actor que tamén tivera esa diversidade funcional”, que é o caso de Felipe Cotelo. Do outro lado atopamos a Iria Sobrado, que para Antón é “unha desas grandes actrices do noso país. Traballar con ela está a ser un auténtico pracer, o soño de calquera director”.
A curta conta tamén con certa presenza viguesa, xa que os rapaces e rapaces do IES Audiovisual de Bouzas están a botar unha man no apartado técnico. A maiores, Veiga adiántanos en exclusiva que o músico Eladio Santos, que vén de presentar un novo adianto do próximo disco da súa banda, foi o encargado da composición da canción orixinal da obra. Todo un luxo.
En total, un equipo dunhas 21 persoas están estes días a rodar en diferentes localizacións de Porriño (Hotel Maracaibo, Sala Ingrávida, Bumba…), vila “chea de cultura e boa xente” na que segundo Antón todo están a ser facilidades por parte das institucións, hosteleiros e cidadanía. A intención do director é presentalo para esta edición do Festival de Cans, que pecha as incricións o próximo 1 de marzo, “pero a estrea será no mes de marzo, cunha festa na que temos preparadas algunhas sorpresas máis que interesantes”.
Pablo Vázquez
Últimos posts de Pablo Vázquez (ver todos)
- Beiramar de fondo: o pasado industrial de Vigo sae á superficie - 29 Agosto, 2024
- 12 festivais para pechar o verán e comezar o outono - 29 Agosto, 2024
- Pantomima Full, La Ruina, Héctor Alterio ou Cayetana Guillén-Cuervo visitan este outono o Teatro García Barbón - 21 Agosto, 2024
- Acampadas, artistas que non son, erros contractuais, músicos vigueses… así foi Castrelos 2024 - 19 Agosto, 2024
- Por que todos os concellos da contorna teñen festivais de jazz e Vigo non? - 6 Agosto, 2024