A Movida precisa de ti

Xornalista por vocación. Marchou a Londres estudar un master en Xornalismo Internacional e tras traballar varios anos en Barcelona nunha Asociación sen ánimo de lucro, decide volver ao seu Vigo natal. Na actualidade é unha das creadoras deste proxecto. O que lle permite desenvolver unha das tarefas polas que sinte maior paixón: contar historias relacionadas coa cultura e a movida da súa ben querida cidade olívica.

Paula Cermeño é licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado avistala en moitos dos saraos vigueses.

Creativo ao cadrado, Rubén González (Vigo, 1982) é Licenciado en Publicidade e Relacións Publicas pola Universidade de Vigo. Leva quince anos entre illustrators e indesigns. Pasou por axencias de publicidade e por editoriais nacionais. Como emprendedor, é un dos responsables de Ultramarinos Deseño Galego -marca que quere reinventar o concepto de souvenir-, actividade que compaxina co seu traballo como publicista freelance. Ah! Tamén é o responsable do deseño da revista A Movida.

Uxío é Técnico Superior en Produción de Audiovisuais e Espectáculos e Especialista en dobraxe pola Universidade de Vigo, onde cursou o Grao en Estudos de Galego e Español. Actor de dobraxe con máis de dez anos de experiencia, participou en producións tan coñecidas como Astérix: A residencia dos deuses ou Harry Potter e tamén levou a cabo diferentes actividades para produtoras de cinema, radio, televisión e vídeo.
Habitual da Facultade de Filoloxía e Traducción da Universidade de Vigo, formou parte da Área de Normalización Lingüística, e ten colaborado activamente en iniciativas do centro.

Licenciada en Comunicación Audiovisual e cun afán de contar historias fixo un máster en guión audiovisual. Os derroteiros da vida a levaron a traballar no mundo da web e no deseño gráfico no que agora dedica case o 100% do seu tempo. Pero sempre sen deixar de lado a súa paixón por contar historias, xa sexa con lapis e papel ou cunha cámara polas rúas do seu querido Vigo.

Juan Teixeira é un fotógrafo documental con sede en Vigo. Cursou estudos de Publicidade e RRPP, pero pronto se decatou de que aquel non era o seu lugar. A través dunha serie de viaxes por Sudamérica e o sueste asiático, observou que a fotografía era unha forma de relacionarse e explorar o mundo dun modo moi persoal, coma un espectador que intenta comprender o que sucede ao seu redor. Desde entón intenta comprender ese mundo que o rodea, centrándose nas persoas e as súas relacións con outras persoas, coa sociedade, a natureza e o tempo e o lugar que a cada unha lles toca vivir.

Estela naceu no 92 (o ano de Cobi) preto do mar. É filóloga e correctora literaria, cirurxiá de textos, amiga das redes sociais e ten un interese case innato pola moda e a cultura. Estela é aprendiza de todo e especialista en nada, ten incontinencia verbal crónica, e, grazas á mellor das sortes, as palabras danlle de comer.

Desde 2014 Carnotto é fotoxornalista freelance e traballa para diferentes publicacións. O seu traballo publicouse en The Guardian, Der Siegel, Financial Times, Vice Magazine, El País. No 2017, gaña a “Imagem do ano” no prestixioso concurso Estaçao-Imagen de Portugal. No mesmo ano gaña o Galicia en Foco, o premio fotoxornalístico máis antigo de Galicia promovido polo Clube de prensa de Ferrol. O seu traballo sobre os migrantes forma parte dun libro publicado en 2016 baixo o nome A ruta dos refuxiados.

É dramaturgo, narrador oral e docente. Premio Abrente (ex aequo) con Fendas e Premio Rafael Dieste con Despois das ondas. Foi seleccionado polo INAEM no Programa Dramaturgias Actuales (El hombre que soñaba con elefantes en las estrellas), no grupo de escrita teatral DramaturXA do CDG (Onde veñen morrer as baleas) e na bolsa Nuevas Dramaturgias de Euskadi (Canciones amarillas para flores tristes). Cofundador da compañía Feira do Leste, coa que estreou Exilio das moscas e Tras Tannhäuser (axudas á Creación Joven do INJUVE). Membro do consello de redacción da erregueté | Revista Galega de Teatro, colabora tamén coa Revista Grial e A Movida de Vigo.

Amante supervivente, o seu ser flutúa nun universo holístico de letras, melodías, cores e formas. Traductora, creadora, construtiva, nai e camiñante da senda do feminismo. Fala do aquí, do agora, do este é o momento, do que se pode construír, da mirada en positivo, do orgullo de ter chegado até aquí. Da maxia dos momentos de liberdade. Do misterios de sermos persoas.

Educadora infantil e educadora certificada pola Asociación Española e Americana de Disciplina Positiva. É ademais nai de dous pequenos que, segundo di, son os que a fan medrar e aprender cada día. Encántalle a natureza e viaxar, aínda que a súa maior paixón son os nenos e a infancia, como demostra no seu blog Little Scaler, onde aposta pola crianza respectuosa e amosa que criar sen gritos e castigos é posible.

Cinto negro en redes sociais especializada no ámbito deportivo e dedicada ao márketing de contidos desde hai máis de 8 anos. Manchega de nacemento, madrileña de adopción e viguesa de corazón, é unha apaixonada do deporte. Traballa como mentora de Social Media para empresas e asociacións do ámbito deportivo e é unha defensora acérrima dos animais.