39.ª Mostra Internacional de Teatro de Ribadavia

Posted on by

«Memoria, cohesión e innovación», eses son os eixes sobre os que se articula a trixésima novena edición da Mostra Internacional de Teatro de Ribadavia que, como cada verán, converte a localidade da provincia ourensá nun punto de interese escénico e cultural para toda Galicia. Entre o 15 e o 23 de xullo, a Mostra Internacional de Teatro (MIT) ofrece máis dunha vintena de espectáculos, distribuídos entre o Auditorio Manuel María da Casa da Cultura, o Auditorio Rubén García do Castelo, a Igrexa da Madalena, así como outros espazos alternativos do rueiro de Ribadavia e periferia rural.

Espectáculo Fuck me, de Marina Otero | Foto: Matías Kedak

O programa deste ano caracterízase pola forte presenza de mulleres creadoras, entre as que destacan a arxentina Marina Otero, con Fuck me; a escritora Brigitte Vasallo,que presenta un proxecto desenvolto no marco das Residencias Paraíso; e as compañías galegas A Panadaría (Elisa e Marcela e As que limpan), Elahood (Intempestiva) e Matarile Teatro (Fráxil. Handle with care). Os espectáculos Mujer en cinta de correr sobre fondo negro, de Alessandra García; A parábola do angazo, de Talía Teatro; Asfixia, de Vórtice Escénico; Homenaje a Billy el Niño, de Teatro del Barrio; ou Aquellas que no deben morir, de Las Huecas, son algúns dos pratos fortes dunha MIT con abundante programación expandida e diversas actividades complementarias.

En palabras do director artístico desta edición, Roberto Pascual, faise unha aposta «pola nosa cultura, polo legado das persoas pioneiras e os potenciais do noso territorio». O programa da MIT 2023 complétase con dous obradoiros de formación escénica, a resolución do 18.º Premio Abrente de Textos Teatrais, presentacións, homenaxes a Eduardo Alonso e, Rosa Álvarez e Luís Álvarez Pousa, ademais de estrear un servizo de conciliación familiar e unhas xornadas sobre a memoria do teatro galego. Que mellor maridaxe para unha noite de xullo que visitar a vila do teatro na comarca do Ribeiro?

The following two tabs change content below.
My LinkedIn profileMy Instagram profile

Ernesto Is

É dramaturgo, narrador oral e docente. Premio Abrente (ex aequo) con 'Fendas' e Premio Rafael Dieste con 'Despois das ondas'. Foi seleccionado polo INAEM no Programa Dramaturgias Actuales ('El hombre que soñaba con elefantes en las estrellas'), no grupo de escrita teatral DramaturXA do CDG ('Onde veñen morrer as baleas') e na bolsa Nuevas Dramaturgias de Euskadi ('Canciones amarillas para flores tristes'). Cofundador da compañía Feira do Leste, coa que estreou 'Exilio das moscas' e 'Tras Tannhäuser' (axudas á Creación Joven do INJUVE). Membro do consello de redacción da erregueté | Revista Galega de Teatro, colabora tamén coa Revista Grial e A Movida de Vigo.