REVISTA MAIO

Entre fentos, fotografía con naturalidade

Publicado o por

Xa son uns cantos anos os que leva vivindo Nair Romero cunha cámara nas mans, pero foi hai tres cando creou unha empresa para levar ao mundo das vodas o seu estilo natural que, nas súas palabras, foxe dos «posados artificiais».

Se botamos unha ollada rápida ao cartafol desta profesional, comprobamos que é certo: as parellas móstranse cómodas e relaxadas ante a presenza do mar ou da foresta. Alén das fotografías propias do casamento, Nair achega orixinalidade e frescura para as típicas sesións previas ás vodas: «Decatámonos de que eran sempre máis do mesmo; todo o mundo quería ir á praia ou a Cabo Home», relata a fotógrafa.

Para captar a naturalidade, propón que as parellas realicen unha actividade divertida namentres que o persoal de Entre Fentos os rexistran en foto e vídeo. Cómpre sinalar que dispoñen dun dron para os planos aéreos e dunha cámara somerxible para as actividades acuáticas.

Malia estar abertas a novas propostas, os paquetes preestablecidos consisten en visitar as Illas Cíes ou a Illa de Ons, navegar en caiac ou facer snorkel na Ría de Aldán, sucar a Ría de Vigo a bordo dun barco con almorzo ou merenda incluída, ou celebrar un pícnic nun lugar natural con vistas.

O mellor destas sesións é que non están reservadas só para as duplas que xa estean comprometidas, senón que tamén están dispoñibles para parellas sen intención de casar, así como para familiares e amizades que queiran algo para recordar.

entrefentos@gmail.com | 611 15 53 79 | @entrefentos

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.