CASAACUNHA

Xanela, o retrato colectivo do COVID-19 no que podes participar

Estamos a vivir un momento histórico e desde a produtora Gancho Producións queren plasmalo cun proxecto audiovisual colectivo do que todos podemos formar parte. Só temos que enviar algunha imaxe, vídeo ou audio de voz do noso confinamento.

A produtora estradense Gancho Producións atópase inmersa nun novo proxecto no marco do actual período de illamento por mor do COVID-19. O colectivo audiovisual, que veñen de estar nomeados nos Premios Mestre Mateo, buscan plasmar o día a día da cidadanía neste estado de alarma, coa particularidade de que o proxecto documental, titulado Xanela, sexa conformado de xeito colaborativo a través das aportacións de todos aqueles que estean interesados e interesadas en formar parte do mesmo. “Buscamos crear un retrato colectivo da sociedade a través de experiencias extraídas da cotiandade, anécdotas e momentos que reflictan as nosas emocións nesta época tan singular e excepcional, da que non existen antecedentes previos”, indican desde a produtora.
O material audiovisual (que poden ser tanto imaxes, como vídeos ou arquivos de son) debe ser realizado durante o actual estado de alarma e contar cunha duración de entre un e seis minutos. Non existe límite de pezas a enviar por persoa, tendo en conta que o prazo para ser enviadas finalizará dúas semanas despois de que se poña fin ao estado de alarma decretado. Nas contas @xanela.documental en Instagram e Xanela Documental en Facebook, as persoas interesadas atoparán as instrucións necesarias para enviar os seus aportes. Desde Gancho inciden en que buscan a participación de persoas de todo o estado, e incluso doutros países que estean a sufrir este período de illamento forzoso. “Con Xanela queremos testemuñar o sentimento de empatía que se está xerando en todos nós, e o proxecto busca ser unha mostra desta sociedade conectada a pesar do llamento individual”, conclúe Gancho.