REVISTA ABRIL

Rocío Portal (Nutricionista): «Acepto e respecto a diversidade corporal e rexeito que se etiqueten como enfermas persoas por só considerar o peso»

Tras o seu paso polo sector farmacéutico, Rocío somerxeuse no mundo da nutrición e a dietética para constatar que o método tradicional non funcionaba como debería. As pacientes (sobre o 75% do total son mulleres) non conseguían manter as dietas moito tempo e outras, a pesar de ter bos hábitos, non conseguían o peso desexado. Nos casos máis extremos, determinadas recomendacións sobre dietas e estilos de vida derivaban en trastornos de conduta alimentaria (TCA).

Rocío foi así combinando conceptos como o da cultura da dieta, a gordofobia ou a diversidade corporal coa realidade de que persoas de todas as tallas podían presentar perfís saudables, saíndose deses patróns establecidos e arcaicos. Apareceu así o seu enfoque da nutrición: un xeito compasivo, amable e respectuoso coa persoa e o corpo que habita e un lema claro: non hai corpos mellores ca outros.

Na metodoloxía das consultas de Rocío chaman a atención dúas premisas: por regra xeral non se usa a báscula e non se ten en conta o índice de masa corporal (IMC). Para xustificar a primeira, explícanos que o peso non sempre é un indicador de evolución válido ou decisivo e que en moitas ocasións pode xerar obsesión e unha desconexión coas sensacións de fame e saciedade, básicas para unha relación sa entre corpo e alimento. No que respecta ao IMC; a súa opinión é compartida por cada máis vez máis especialistas en nutrición: este parámetro foi establecido hai moitos anos cunha finalidade que nada tiña que ver coa saúde e que non tiña en conta factores tan importantes como a raza, o sexo, a xenética ou o contexto económico e social da paciente. Rocío é categórica a este respecto; considera indispensable que se deixe de etiquetar as persoas como enfermas ou sas polo seu peso.

A pesar de estar centrada na rama da nutrición, como profesional destaca a importancia da relación entre alimento e emocións, é dicir, no aspecto psicolóxico. Tal e como ela di, «as túas emocións poden influír en como comes e viceversa». Por iso cre firmemente na utilidade da alimentación intuitiva para persoas que teñen unha mala relación coa comida despois de varios fracasos con dietas estándar.

REVISTA ABRIL

Como exemplos para reforzar o traballo individual de reconexión co noso corpo, Rocío destaca a importancia de que debería haber máis representación de diversidade corporal nos medios, no ámbito empresarial ou na publicidade, mentres que a nivel persoal é primordial que se deixen de emitir xuízos sobre os corpos, sobre todo dos que non nos pertencen.

Urzáiz, 31 – 3ºA | info@rocioportalnutricion.com / 663 778 558 / @portal_nutricion

Noelia Álvarez
Redactora