Resumo das confirmacións deste verán para Castrelos

Despois dunha semana de vértigo no que a confirmacións para Castrelos se refire, xa coñecemos a nove dos artistas que se subirán ao emblemático escenario vigués este verán: Lauryn Hill, Leiva, Tom Jones, Fangoria, Rick Astley, Roger Hodgson, Thirty Seconds to Mars, Ara Malikian e David Bisbal. Quen serán os que faltan?

Fans en primeira fila no concerto de Morat en Castrelos do verán pasado | Pablo V.

Desde hai uns días as confirmacións dos novos concertos de Castrelos para este verán non deixan de sucederse, polo que sería moi normal que a estas alturas esteas un pouco perdido co cartel. Antes do concerto de Operación Triunfo o pasado agosto, Abel Caballero proclamou que este ano serían 13 os concertos que poderiamos ver no mítico auditorio, mais nas últimas datas a cifra baixou a 11 ou 12. Sexa como sexa, aínda nos quedan mínimo un par de confirmacións máis.

Comezando por orde cronolóxica, polo de agora será a rapeira norteamericana Lauryn Hill a encargada de abrir o programa de Vigo en Festas o día 17 de xullo. Dous días depois chegará Leiva, un dos artistas nacionais con máis sona, que vén de sacar o seu último disco Nuclear fai dous meses.

A semana do 22 de xullo contará nada máis e nada menos que con tres concertos. O primeiro será Tom Jones o martes 23, no que o Tigre de Gales demostrará por que é unha das voces máis importantes da música anglosaxona. Ao día seguinte será o dúo Fangoria, formado por Alaska e Nacho Canut, o encargado de facer bailar ao público local. Para rematar a semana, o venres 26 subirá ao escenario o británico Rick Astley, que está a vivir unha segunda xuventude despois do seu éxito nos anos oitenta.

Tres tamén serán os concertos que haberá a semana seguinte, comezando polo de Roger Hodgson o luns 29. O que fora líder de Supertramp volve a Vigo para repasar tanto a súa carreira en solitario como os temas máis famosos da banda británica. Outro dos gran des nomes que visitará Castrelos será o músico e actor Jared Leto coa súa banda Thirty Seconds to Mars, que actuarán o xoves 1 de agosto. O sábado 3 de agosto será a quenda da última confirmación ata agora, o carismático violinista Ara Malikian, que adaptará ao seu instrumento cancións famosas de todos os tempos nun espectáculo vibrante. Para rematar, de momento teremos o concerto de David Bisbal o xoves 8 de agosto, onde o ex triunfito volve a Vigo cun show máis maduro pero igualmente divertido.

Resumindo:

17 xullo Lauryn Hill
19 xullo Leiva
23 xullo Tom Jones
24 xullo Fangoria
26 xullo Rick Astley
29 xullo Roger Hodgson
1 agosto Thirty Seconds to Mars
3 agosto Ara Malikian
8 agosto David Bisbal

Compartir
X