bannerVialia
RevistaOutubro

Glenda León invítanos a escoitar cos ollos no Marco

Este venres inaugurouse unha nova exposición no Museo MARCO, neste caso da cubana Glenda León. Música das formas, o seu título, incide na importancia que a artista plástica lle otorga á musicalidade da natureza e do espazo, creando pezas sinestésicas e de gran contido simbólico. Estará dispoñible ata o 31 de outubro.

Música das formas, o último proxecto da artista cubana Glenda León, trátase dunha co-produción entre o Museo MARCO e o MEIAC de Badajoz, que chega agora a Vigo ata o 31 de outubro. A mostra atópase na Galería B1 do primeiro andar, espazo cunha disposición ben curiosa que León aproveitou para realizar unha peza ex profeso para o museo vigués. Leva por título Xardín emocional, e consiste nunha ringleira de 15 metros de herba sintética recortada da mesma forma que un electrocardiograma.

Banner A Movidiña

Hai máis de 20 anos que Glenda León iniciouse no mundo expositivo, tras estudar filoloxía, historia da arte e ballet clásico. Deste último venlle a súa paixón pola música e as coreografías, que se vén plasmadas de maneira contínua na súa obra. O espazo,as estrelas, a natureza e a música son algúns dos leit motivs desta mostra, na que atoparemos obras de diferentes técnicas, tamaños e soportes.

Chaman a atención Metamorfosis, formada por dúas tapas de piano con forma de bolboreta; Escuchando las estrellas II, unha peza formada por cordas de guitarra formando constelacións que se pode tocar; Cada sonido es una forma en el tiempo II, onde reinterpreta diferentes espazos e fenómenos nun pentagrama ou La Internacional IV, o himno obreiro por excelencia representado nun pentagrama con anacos de billetes de diferentes partes do mundo.

En palabras do comisario da mostra, José Jiménez: “hai un dinamismo que brota do diálogo coas formas do son, da música, que está xa presente dende a época en que se produxo a invención cultural da arte, na Grecia Clásica. E é tamén nese contexto onde se percibe a relación entre os sons musicais e os movementos dos astros, o que Pitágoras denominou ‘armonía do cosmo’ ou ‘música das esferas’. A música das esferas lévanos á música deste mundo, no que vivimos: de arriba abaixo, e de abaixo arriba. Son estas cuestións centrais para situar a traxectoria e o traballo artístico de Glenda León”. 

X