SonDeSeu e a ETRAD: Vocasóns

VOCASÓNS, Ensemble de mestres de SonDeSeu e a ETRAD é o nome do espectáculo que ofrece a Orquestra Folk de Galicia SonDeSeu os xoves 17 e 31 de outubro ás 20:30 h no Auditorio Municipal, con entrada libre ata completar aforo.

Unha homenaxe da orquestra á Escola Municipal de Música Folk e Tradicional que cumpre 28 anos formando á cidadanía viguesa na música e nos instrumentos patrimoniais galegos. Trátase de dous concertos didácticos pensados para tódalas idades e públicos nos que soarán nove dos temas tradicionais galegos máis representativos, acompañados dunha peza audiovisual que relata a historia da palabra, do ritmo musical e a súa orixe. O traballo de vídeo corre a cargo de Casa Gallinitas, estudantes da ETRAD e finalistas na última edición dos Premios Youtubeiras.

SonDeSeu naceu no seo da ETRAD no ano 2001; o seu alumnado fai as prácticas orquestrais e conforma o elenco da formación e ten visitado numerosos países e escenarios, contando coa presenza das mestras e mestres da ETRAD, que son referentes non panorama da música tradicional e folk galega e europea, con recoñecementos como un Grammy, un nomeamento aos Grammy Latinos, Premios da Crítica de Alemaña e Galicia…