Vigo Global Summit

O congreso Vigo Global Summit, que se celebra os días 27 e 28 de xuño no auditorio Mar de Vigo coincidindo co 75 aniversario de Zona Franca, está dirixido polo catedrático da Universidade de Vigo Santiago Lago Penas e conducido polo xornalista pontevedrés Xabier Fortes. O evento virará arredor de tres mesas de debate que tratarán algúns dos asuntos clave para comprender mellor como será a economía do futuro.

O cambio climático, a transición enerxética, o envellecemento poboacional, os cambios sociais ou o despregamento masivo da intelixencia artificial e a robotización serán algúns dos temas que se traten nestas xornadas nas que se pretende analizar en detalle o rol que poden e deben desempeñar cidades e rexións na definición de sistemas económicos máis eficientes e sostibles, máis equilibrados e cohesionados no horizonte de 2030 e máis aló.

Dous Premios Nobel por prmieira vez en Galicia

O prato forte é a presenza de dous Premios Nobel de Economía: Paul Krugman e Abhijit Banerjee. As perspectivas que ofrecerán nas súas conferencias maxistrais os dous esconomistas son complementarias:

A conferencia de Krugman centrarase na análise da conxuntura a escala global. Unha conxuntura marcada, entre outros vectores, polo brusco cambio na orientación da política monetaria a ambos os dous lados do Atlántico e por unha redefinición das relacións políticas e económicas a escala global. Nela destaca a reacción #ante as debilidades das cadeas loxísticas globais, que a pandemia mostrou con nitidez e a pugna polo liderado en sectores crave para o futuro, como a intelixencia artificial.

Pola súa banda, a conferencia do profesor Banerjee envorcarase nos desafíos estruturais e de longo prazo para o benestar económico a escala global. O desenvolvemento dos países hoxe máis atrasados debe facerse dentro duns parámetros diferentes aos de hai unhas décadas. Sabemos que o planeta non pode permitirse un crecemento despreocupado da súa pegada ecolóxica e dos seus efectos sobre o quecemento global. Toca, por tanto, pensar en como cumprir objeticos de desenvolvemento sostible no mundo actual e as súas restricións.

Podes consultar o programa completo dos dous días premendo aquí.