Os británicos Tim Holehouse e Lewis McKale arriban á Casa de Arriba

Tim Holehouse leva os últimos 17 anos na estrada, amosando a súa visión musical por todo o mundo, viaxando e tocando por puro amor á música. Imaxe arquetípica do bluesman de voz rasgada, desterrado da sociedade e acosado por demos persoais, presenta nunha discografía de máis de 20 álbums a súa versión mutante do Delta Blues, cos seus característicos “bottleneck” slide e énfases rítmicos, actualizados con acenos á música experimental e a combinación con outros xéneros. Presenta o seu último álbum “NO” (2024). Na súa nova xira por España e Portugal, vén acompañado do músico inglés afincado en Ponferrada Lewis McKale, quen presenta a súa última produción discográfica “Ghost At The Feast”.